"Skema sterilizimit është bërë nga lartë-poshtë", kallëzuesi Shabani del me kërkesën e fortë ndaj Beqajt: Të kthehen paratë e qytetarëve me të cilat ndërtuat vila

Kallëzuesi Endri Shabani ndaj aferës së koncesionit çoi para dyerve të SPAK ish-ministrin e Shëndetësisë, Ilir Beqaj.

Në një studio televizive ai tha se korrupsioni i bërë në çështjen e sterilizimit është bërë me urdhër nga lartë-poshtë dhe jo anasjelltas. Ai theksoi se ministri Beqaj nuk mund të amnistohet dhe të lihet jashtë përgjegjësive penale.

Sipas tij që drejtësia të vihet në vend duhet të sekuestrohen paratë ose pasuria e vënë nga zyrtarët përmes këtij koncesioni abuzues.

“Unë mendoj që kjo është një skemë që nuk është bërë kurrësesi nga poshtë lartë, është bërë nga lart poshtë. Duke menduar që është bërë nga lart poshtë, përgjegjësia vjen gjithashtu nga lartë poshtë. Deri sot të gjithë të tjerët ishin me masa sigurie dhe vetëm ministri nuk ishte me masë, por siç e tha dhe zonja Imeraj hetimi po vazhdon dhe nuk është mbyllur dhe akuzat mund të shtohen.

Për mua si qytetar nuk ka rëndësi sa kohë burg bëjnë këta. Për mua si qytetar ka rëndësi që paratë që janë vjedhur të kthehen mbrapsht. Të ndërpritet vjedhja që i bëhet qytetarëve dhe të konfiskohet pasuria. Me ato para mund të jenë bërë vila, mund të jenë fshehur te tubi i sobës dhe këtu bëhet drejtësia”.