SPAK mbyll hetimet për inceneratorin e Fierit dhe rëndon pozitat e Alqi Bllakos, ish-deputeti akuzohet për korrupsion dhe shpërdorim detyre, ja si u përlanë 4 milionë euro me punë të pabëra

SPAK ka mbyllur hetimet për inceneratorin e Fierit. Ish-ministri i Mjedisit, Lefter Koka, ish-deputeti i PS-së Alqi Bllako dhe 19 persona të tjerë zyrtarë dhe biznesmenë, janë dërguar në gjyq nga SPAK për dosjen e abuzimeve me incineratorin e Fierit. Hetimet gati 3-vjeçare kanë evidentuar një dëm prej 4 milionë eurosh me pagesa për punë të pa kryera dhe rreth 60 milionë lekë dëm me skemën mashtruese të rimbursimit të TVSH-së të realizuar nga bosët e incineratorëve përmes blerjeve fiktive. Prokuroria e Posaçme dërgon në gjykatë dosjen e dytë për skandalin e incineratorëve, kësaj radhe për episodet e abuzimeve në qytetin e Fierit. Rreth dy javë më parë, GJKKO firmosi 11 urdhër-arreste për inceneratorin e Fierit, 10 ‘arrest në burg’ dhe 1 në ‘arrest shtëpie’. Për 5 prej tyre vendimi u ekzekutua, teksa 5 të tjerë janë jashtë territorit të vendit. Nga hetimet e SPAK rezultoi se janë pasqyruar shërbime që nuk janë kryer në vlerën e 4 milionë eurove, vlerë e paguar nga Autoriteti Kontraktor dhe e përfituar përmes mashtrimit nga shoqëria koncesionare “Integrated Technology Ëaste Treatment Fier” sh.p.k. Nga hetimet e SPAK rezultoi se Klodian Zoto, me bashkëpunëtorët, organizuan dhe vunë në funksionim skema mashtruese në lidhje me tatimin mbi vlerën e shtuar, me qëllim fitimin për llogari të inceneratorit që ka konsistuar në përfitimin e kreditimit TVSH-së. Shoqëria ka realizuar blerje fiktive nga kompanitë e personave të përfshirë në vlerë totale prej 359.4 milionë lekë dhe dëmi i shkaktuar përmes TVSH-së në buxhetin e shtetit është 60 milionë lekë.

Të arrestuarit 

Në pranga përfunduan Regan Merdani, Robert Shabani, Gentian Zifla dhe Enver Sheshi, ndërsa në kërkim janë Arber Denizi, Juri Ymeraj, Silvester Dreza, Arjola Kodra, Luran Dusha dhe Giuseppe Ciaffaglione. Në mesin e të arrestuarve është Arben Dervishaj, në cilësinë e mbikëqyrësit të punimeve të inceneratorit të Fierit, i cili ka miratuar dhe më pas dorëzuar në institucionet shtetërore raportet për punime fiktive të shoqërisë, për shërbime që nuk janë kryer dhe pajisje që nuk janë realizuar sipas kontratës. Gjithashtu, Arben Dervishaj ka marrë përfitime të parregullta nga Klodian Zoto, aksioner kryesor i inceneratorit, përfitime të udhëtimeve të tij private, biletave avioni, qëndrimet në hotele dhe të biletave të ndeshjeve të futbollit në stadium në Itali. Zoto me administratorët e inceneratorit kanë përdorur një skemë fiktive të kryerjes së pagesave, për të mbuluar dhe fshehur natyrën e vërtetë të origjinës së shumave monetare. Ndërkohë, ashtu siç dyshonte që në mars SPAK thotë se ka faktuar se Alqi Bllako, në atë kohë punonjës në Ministrinë e Mjedisit, ka përfituar 14.9 milionë lekë përmes pagës së të atit, Edmond Bllako, duke u paraqitur si drejtor kantieri në inceneratorin e Tiranës me pagë 6 mijë euro, me pagesa nga 2018-a në 2020.