Spartak Braho: Balluku pjesë e oligarkisë politike të Ramës, rruga Kardhiq-Delvinë aferë e pastër korruptive

Ish-deputeti i Partisë Socialiste dhe ish-kryetari i Komisionit të Sigurisë Kombëtare, Spartak Braho e ka quajtur skandal aferën e rrugës Kardhiq- Delvinë, e cila mori 16 vjet për t’u ndërtuar dhe në fund doli me një kosto sa dyfishi i asaj që ishte parashikuar. Gjatë një prononcimi për mediat, zoti Braho akuzoi ministren e Infrastrukturës, Belinda Balluku, se sipas tij, është pjesë e oligarkisë politike të Ramës. “Rruga Kardhiq-Delvinë ka filluar qëkur ka qenë ministër Olldashi. Është në kuadër të aferave korruptive ku është përfshirë ministria e Ekonomisë. Balluku është pjesë e oligarkisë politike të Ramës, me atë zgjidh ato që do ai, për të krijuar atë që quhet “era e Ramës”. Ai është megaloman, i ka hipur në kokë që ti ngjajë njerëzve të mëdhenj. Po të ketë ushtri, fillon edhe luftën në Ballkan. Por nuk ka ushtri, s’ka as këllqe. Del atje dhe dënon gazetarët kot. Ç’punë ka ai me gazetarët. Sido që të jetë, gazetari ka të drejtë. Oligarkia ekonomike e grumbulluar në 10-15 vetë. Le të botojë listën e investitorëve strategjikë dhe të shohë. E kam parë listën dhe është për të vënë duart në kokë. Enturazhi ekonomik i Ramës dhe bankomati financiar i Ramës, ku fshihet drejtori i KESH, Vangjush Dako, etj. Problematika është shumë e ngjeshur. Pakënaqësia në opinion është e madhe. Si të mos zemërohesh kur ministria e Shëndetësisë blen krevat dopjo. Po ia falim karrigen se do të rrijë rehat, po krevatin çe do. Ti ke bllokuar për mungesë ilaçesh laboratorin e analizave, tani blen krevate. Rama i ka hipur gomarit mbrapsht”, deklaroi Braho.