Spartak Ngjela paralajmëron ndryshimin e madh në politikën shqiptare: A mund të shkëputen PS dhe PD nga konformizmi i Edi Ramës dhe Sali Berishës?

Avokati i njohur Spartak Ngjela, ka folur ditën e djeshme për ndryshimet që ka pësuar politika shqiptare, duke përmendur këtu edhe diktatorin Enver Hoxha. Ngjela ka thënë se në sistemet shqiptare të shtetit, në Shqipëri, Enver Hoxha kishte një urrejtje kriminale kundrejt jokonformizmit. Sipas tij, Hoxha kështu mbronte tiraninë e tij sunduese në Shqipëri. “Konformizmi është një mënyrë sjelljeje e cila ka vijueshmëri në qytetërim. Vjen nga latinishtja, conform ( con-form), që don të thotë se diçka është bëre në mënyre të plotë nga një model-e bërë si. (Make as-Oxford Dictionary). Edhe sot ne kemi një Parlament konformist, por dykrahësh ama. Në Parlamentin shqiptar, në 30 vjet janë përplasur dy lloje konformizmash politikë, i majtë dhe i djathtë, e asgjë tjetër. Por, dallon që në Shqipërinë e sotme ka ende reflekse të konformizmit kriminal të Enver Hoxhës, që ka ecur sipas kësaj devize: kjo, dhe asgjë tjetër, dhe, unë, e asnjë tjetër. Por, ndërkohë duhet të shohim se çfarë do të sjellë Partia Demokratike tani që e ka nxjerrë jashtë vetes Sali Berishën, armikun aktual të jokonformizmit? A do ta krijojë Partia Demokratike në politikë jokonformizmin si natyrë të lirisë, demokracisë dhe personalitetit? A do të shkëputet nga turmat e Saliut, për të ardhur te zhvillimi integral jokonformist i politikës shqiptare?”, shkruan Ngjela. Sipas avokatit, Partia Socialiste nuk ka shenja se mund të shkëputet nga konformizmi kundrejt Edi Ramës. Ngjela ka përcaktuar dhe çfarë është konformizmi. “Konformizmi shpesh është një servilizëm i rëndomtë. Konformizmi është një frikë nga autoriteti. Konformizmi është kapitullim ndaj së vërtetës, kur pranon gënjeshtrën. Konformizmi është edhe vetëm frikë. Konformizmi është depersonlizim për atë që e pranon për interes. Konformizmi është natyra e njeriut të paditur. Konformizmi është edhe një nënshtrim politik ndaj së keqes. Konformizmi është natyrë shoqërore sunduese në çdo tirani apo diktaturë”, është shprehur Ngjela.