Spartak Ngjela tregon goditjen tronditëse që ka marrë Vuçiç nga Joe Biden dhe paralajmëron bashkimin e madh Shqipëri-Kosovë

Avokati i njohur Spartak Ngjela, ka reaguar për qëndrimin e fortë amerikan, se asociacioni nuk duhet të jetë shtet brenda shtetit të Kosovë. Sipas Ngjelës, politika amerikane, me anë të Presidentit Biden, e hodhi poshtë mendimin e pushtetarëve shitës të Kosovës për Zajednicën. “Procesi i Zajednicës ishte një tradhti kombëtare, që erdhi me Marrëveshjen e Brukselit në vitin 2013 midis Kosovës dhe Serbisë. Kjo marrëveshje u nënshkrua nga Hashim Thaçi kryeministër i Kosovës, dhe Ivica Daçiç kryeministër i Serbisë. Sipas kësaj marrëveshjeje kërkohej që brenda Kosovës të kishte komuna serbe të pavarura si njësi kushtetuese. Domethënë që, pas një viti, ato të mund të kërkonin pavarësinë nga Kosova, ashtu sikundër që bëri edhe Kosova kundrejt Serbisë; sepse edhe Kosova ishte njësi konstituente. I pari që nuk e pranoi Marrëveshjen e Brukselit ishte Ramush Haradinaj, si kryeministër i Kosovës. Haradinaj theksoi se Kushtetuta e Kosovës e lejon asocimin e komunave serbe në Kosovë, por, pa pasur fuqi legjislative, gjyqësore dhe ekzekutive.  Sot kjo u mbyll përfundimisht”, shprehet Ngjela. Ai shkruan  se politika Biden duhet të ngrihet lart, nga shqiptarët, sepse sipas tij Biden foli dhe brenda konceptit kushtetues të Gjykatës Kushtetuese të Kosovë, kur ai tha: “Duke i qëndruar vendimit të Gjykatës Kushtetuese të Kosovës, komuna si njësi kushtetuese nuk mund të lejohen në Kosovë”. “Tani kuptohet se ekzistenca e dy shteteve shqiptare në Ballkanin Perëndimor po tregon se gjithçka po ecën drejt bashkimit kombëtar.  Duhet ta kishit kuptuar, o mjeranë! se Shqipëria e bashkuar pritet të jetë shteti kryesor në Ballkanin Perëndimor, për ndalimin e penetrimit të Rusisë këtu.  Dihet tani se antishqiptarizmi është bashkë me korrupsionin e lartë shtetëror në Tiranë, por nuk kanë fare të ardhme”, përfundoi analizën e tij Ngjela.