Tabaku: Shqipëria vendi më i korruptuar i Ballkanit Perëndimor, sistemi i taksave favorizon oligarkinë dhe jo konkurrencën, mungon meritokracia

Deputetja e Partisë Demokratike, Jorida Tabaku ka ngritur ditën e djeshme alarmin, ndërsa është shprehur se Shqipëria është vendi më i korruptuar i Ballkanit Perëndimor. Përmes një postimi në faqen e saj në “Facebook”, zonja Tabaku shprehet se sistemi i taksave favorizon oligarkinë dhe jo konkurrencën. “Çfarë mund të bëjë një shtresë e mesme sot? Mund të blejë një shtëpi pa pasur një normë të lartë interesi mbi kokë sepse çmimet e shtëpive kanë shkuar në qiell?! Jo! A ka një rrogë më të mirë dhe më shumë të ardhura se sa dje? Jo! Të ardhurat e shqiptarëve janë më të ulëtat në rajon. A taksohet aftësia e tij më shumë se sa taksohen bizneset e oligarkëve? Po! Sot, shtresa e mesme taksohet me 23%. Një ligj special do të taksojë sipërmarrësit e vetëpunësuar me 23% gjithashtu ndërkohë që oligarkëve u jepen falje taksash pa limit. Shqipëria është vendi më pak i përshtatshëm për të bërë biznes në rajon. Ka një shtet të kapur që ka miratuar mbi 10 ligje me porosi. Sistemin e taksave që favorizon oligarkinë dhe jo konkurrencën. Vendi më i korruptuar në Ballkanin Perëndimor kurse shqiptarët janë të parët në Europë për shkak se mungon meritokracia dhe mobiliteti social”, shkruan ajo. Ndërkohë mënyrën se si mund të shpëtohet vendi, ligjvënësja Tabaku e arsyeton, duke renditur  tre nga pikat, të cilat i ka propozuar edhe në Parlamentar. Sipas saj, korrupsioni lulëzon sepse mungon meritokracia dhe mobiliteti social. “Si mund të shpëtojmë? Tre pikat e mia të propozuara që në nisje të sesionit parlamentar: Tregu i lirë përballë tregut të kapur dhe shtetit të kapur që prodhon një sistem të mbyllur; Lufta kundër korrupsionit përmes ligjeve dhe vullnetit politik që kjo qeveri nuk e ka; Mobiliteti social që arrihet përmes konkurrencës dhe jo oligarkisë. Ne mund ta rrëzojmë sistemin e kalbur të 3 dekadave përmes Lirisë së Tregut, mobilitetit social, luftës kundër korrupsionit & taksave të ulëta”, nënvizoi deputetja e PD, Jorida Tabaku.