Tabaku: Shqiptarët blenë 9% më pak karburant dhe paguan 185 mln euro më shumë, qeveria asnjë masë për të ndihmuar qytetarët gjatë dimrit

N/kryetarja e PD zyrtare, Jorida Tabaku u shpreh në rrjetet sociale se inflacioni në vend vazhdon të rritet teksa tregoi se qytetarët shqiptarë kanë vlerë 9% më pak karburant, por kanë paguar 185 milionë euro më shumë. Ajo fajësoi qeverinë socialiste se ka shtrenjtuar çmimet e lëndëve djegëse dhe produkteve bazë ushqimore dhe taksat. Sipas Tabakut, qeveria po mënjanon shumicën e qytetarëve nga mbrojtja dhe lehtësimi ekonomik. “Çdo ditë kam pyetje nga qytetarët se çfarë është inflacioni?! Shembull më të mirë për ta shpjeguar se sa fakti që shqiptarët kanë blerë 9% më pak karburant dhe kanë paguar 185 mln euro më shumë, nuk ka. Sot çdo produkt, nga karburanti deri tek ushqimet: buka, veza, qumështi, kushtojnë më shtrenjtë. Ky është inflacioni! Ky është inflacioni socialist. Si rezultat i rritjes së taksave dhe mungesës së vëmendjes së qeverisë”, shprehet fillimisht deputetja demokrate. Më tej, ajo ngriti shqetësimin se me nisjen e dimrit të ftohtë dhe me reshje të shumta, por dhe me situatë të vështirë energjitike të paralajmëruar nga qeveria, qeveria nuk ka publikuar asnjë plan masash ekonomike, energjitike dhe sociale për qytetarët. “Në fillim të dhjetorit, të një muaji të vështirë, të një dimri të vështirë nuk kemi asnjë përgjigje reale nga qeveria se cilat do jenë masat për të ndihmuar Shqipërinë dhe shqiptarët”, përfundoi mesazhin e saj n/kryetarja e PD zyrtare, Jorida Tabaku.