Tensionet në Kosovë/ “Jemi naivë nëse themi që s’mund të ketë konflikt”, Mediu bën paralajmërimin e fortë: Mund të kemi skenar të ngjashëm me...

Kreu i Partisë Republikane Fatmir Mediu, përmes një komunikimi të drejtpërdrejtë në një emision televiziv ka folur në lidhje me një takim të zhvilluar me kongresmenët Pete Sessions dhe Robert Aderholt, në kuadër të përgatitjes të Forumit të Sigurisë për Ballkanin.

Mediu u shpreh se u ka përcjellë kongresmenëve amerikanë shqetësimet për Kosovën, duke u transmetuar se ajo që ndodhi në Veri ishte një akt terrorist i mbështetur nga Beogradi.

Sipas tij armatosja e Serbisë nuk është e paqëllimshme, por është një politikë ofensive e qeverisë serbe, që mund të sjellë skenarë të ngjashëm me Krimenë dhe Gjeorgjinë.

“U kam përcjellë shqetësimet e Kosovës kongresmenëve amerikanë. Ajo që unë u përcolla është fakti se ajo që ndodhi në Kosovë ishte një akt terrorist i mbështetur nga qeveria e Beogradit. Armatosja e Serbisë nuk është pa qëllim. Është një politikë ofensive e ministrisë së mbrojtjes. Janë skenarë të ngjashëm me Krimenë dhe Gjeorgjinë.

Ne duhet të mbajmë një qëndrim të unifikuar dhe Tirana duhet të jetë zëdhënëse e qëndrimeve të Prishtinës. Nuk duhet të tregohemi naivë sa të themi se nuk do ketë një konflikt. Ndryshimet gjeopolitike do kenë ndikimet e tyre. Kosova dhe dialogu i saj janë një nga problemet më të mëdha momentalisht.
Rusia kërkon një tjetër vatër konflikti dhe ajo që po ndodh në Kosovë ka mbështetjen e edhe të Rusisë”, u shpreh ai.