Thellohet skandali me koncesionet, Ministria e Shëndetësisë jep për “Hemodializën” 2.5 milionë euro për punë të pakryera

Vijon që të thellohet skandali lidhur me koncesionet. Kontrolli i Lartë i Shtetit  ka nxjerr të tjera detaje, se si Ministria e Shëndetësisë ka dhënë për hemodializën 2.5 milionë euro. Sa i takon koncesionit për ofrimin e hemodializës audituesit kanë konstatuar se janë bërë pagesa për fatura kur ende nuk kishte nisur dhënia e shërbimit dhe kjo për një periudhë të konsiderueshme. Madje, faturat që janë kthyer në titull ekzekutiv i kanë kushtuar jo pak problematika institucioneve në dyert e gjykatave. Kontrata koncesionare parashikon dhënien e shërbimit për pacientët e kualifikuar të cilët do të marrin 156 seanca në vit apo 13 në muaj. Kontrata koncensionare mbart një problematikë sipas KLSH që lidhet me seancat e pakryera.“Nga auditimi konstatohet se nga FSDKSH paguhen edhe seancat mbi vlerën e projektuar të aneksit të kontratës, edhe seancat e parealizuara sipas projeksioneve për rajonet përkatëse, duke paguar kosto shtesë për buxhetin e shtetit dhe për shërbime të pa ofruara. Në këtë mënyrë konstatohen përcaktime konfliktuale në kontratën e financimit për sa i përket pagesës për rastet e shërbimeve të pakryera, të përkufizuara si rastet nën projeksion. Nga njëra anë përcaktohet që paguhen sipas projeksionit dhe nga ana tjetër përcaktohet që rastet e paguara të cilat nuk janë kryer përbëjnë dëm ekonomik. Pra, në të njëjtën kontratë financimi parashikohet edhe pagesa për rastet e pakryera edhe konsiderimi si dëm ekonomik i pagesës së rasteve kur vërtetohet se shërbimet e pretenduara nuk janë kryer. Në total, efekti i financimit të shërbimit të pakryer që në implementimin e kësaj kontratë koncesionare (në vitin 2016) e deri në fund të vitit 2020 (duke përfshirë edhe vlerën e faturave të shndërruara në titull ekzekutiv me vendim gjyqësor trajtuar në një tjetër gjetje nga auditimi) vlerësohet në shumën 352,334,350 lekë. Mbështetur në nenin 10.1 të kontratës së financimit të lidhur ndërmjet palëve si dhe ligjit për FSDKSH, pagesa e rasteve të pakryera të cilat kalojnë edhe projeksionin e paraqitur në Dokumentet Standardë të koncesionit, pjesë e kontratës së koncesionit, paraqet përdorim pa efektivitet të buxhetit të fondit”, thuhet në raport.

KLSH: Për 2020-ën janë paguar 695 milion lekë

Ndërkohë, në raport bëhet me dije se për vitin 2020 janë paguar 695 milion lekë nga 648 milion lekë të realizuara një vit më parë. Sipas KLSH, në lidhje me faturimet për këtë kontratë koncesionare konstatohet se është arritur dhe tejkaluar projeksioni sipas dokumenteve standardë të koncesionit për numrin e seancave të ofruara në dy rajone.“Për vitin 2020 janë paguar 695 milion lekë nga 648 milion lekë të realizuara një vit më parë. Nga të dhënat e vëna në dispozicion në lidhje me faturimet për këtë kontratë koncesionare konstatohet se është arritur dhe tejkaluar projeksioni sipas dokumenteve standardë të koncesionit për numrin e seancave të ofruara në dy rajone dhe nuk është arritur projeksioni për rajonet Sh, V dhe K, ku faturimi është kryer për vlerat e projektuara dhe jo për nivelin faktik të shërbimit nën projeksion”, thuhet në raport.