“Thika pas kurrizit”, Braçe tregon arsyet pse u largua nga qeveria e përplasjet me Ramën: S'kishte vend për dy

Deputeti i Partisë Socialiste, Erion Braçe ka folur së fundmi në lidhje me arsyet e largimit nga kabineti qeveritar, ku ishte zëvendësi i kryeministrit Edi Rama. I ftuar në emisionin “dje në një studio televizive, Braçe theksoi ditën e djeshme se ka qenë zgjedhja e tij që të mos ishte më në qeveri gjë që ia ka parashtruar kryeministrit, por ka folur edhe për “thika pas kurrizit”. Madje, deputeti theksoi se ka gjëra që nuk kanë dalë në dritë dhe ndoshta kjo gjë do të ndodhë me kohën, por nuk mund të qëndronte në një pozicion ku shumë gjëra nuk i pëlqenin. Ai tha gjithashtu se pati edhe një fushatë të madhe për shkak të një çështje penale nga SPAK-u përkundrejt një kryetari bashkie, që u hodh mbi të. “Ishte zgjedhja ime që të mos isha në qeveri. Ka shumë arsye, një pjesë janë konsumuar mes meje dhe kryeministrit. Janë disa gjëra që mbase koha mund t’i tresë apo t’i nxjerrë në dritë më vonë. Janë disa gjëra që lidheshin me mua, që ia kam komunikuar kryeministrit. Në fund ishte zgjedhje e imja që duhej respektuar. Kishte shumë gjëra që s’më pëlqenin, gjithmonë në raport me mua. Një prej elementëve janë këto thikat pas kurrizit. Jemi pothuajse në të njëjtat ditë. Pati një fushatë të madhe në atë moment edhe për shkak të një çështje penale nga SPAK-u përkundrejt një kryetari bashkie, që padrejtësisht, tërësisht në mënyrë të rreme, por e nxitur politikisht edhe nga brenda, u hodh mbi mua mbi kurriz. Jemi në dritën e një gjyqi, që ka nxjerrë të vërtetën në publik dhe unë s'kam të bëjë fare. Në atë periudhë s’mund të ndaja qeverinë me një person që e nxiste këtë gjë. Edi Rama ishte i qartë për çështjen, por në të tilla kushte s’kishte vend për dy, kishte vend vetëm për një. Janë shumë gjëra që mendova se mund t’i ndryshoja nga brenda”, deklaroi Braçe. Në fund të verës së vitit 2021, Braçe bëri me dije largimin nga kabineti qeverisës, përmes një statusi shterues në rrjetet sociale, ku shkruante se ‘gjithçka ka një fund’. Në vendin e Braçes si zëvendëskryeministër u pozicionua Arben Ahmetaj.