Vetingu konfirmoi 91 prokurorë dhe shkarkoi 50, Balla: Nevojiten 103 prokurorë të rinj në sistem, vakancat plotësohen për rreth 4-5 vite

Plotësimi vakancave në prokurori kërkon rreth 4-5 vite, me një ritëm emërimesh 25-26 prokurorë në vit. Alfred Balla, kryetari i Këshillit të Lartë të Prokurorisë, duke raportuar dje tek Komisioni i Ligjeve, u tha se vetingu ka krijuar një boshllëk të madh në radhët e Prokurorisë. “Presim 105 prokuror të futen në sistem në këto 4-5 vite. Asnjëherë nuk kemi arritur të kemi 341 prokurorë të plotë sipas strukturës. Kujtoj janë ende 70 prokuror që s’kanë përfunduar vetingun”, tha Alfred Balla. Për të zgjidhur problemin e vakancave, Balla kërkoi nga ligjvënësit të gjendet një mekanizëm zhbllokues për të afruar më shumë prokurorë nga magjistratura.“Për këtë vit që kërkuam 40 kandidatë nga magjistratura, na kanë kaluar 26”, tha Balla. Ai tha se kalueshmëria në procesin e vetingut për prokurorët ka nivelin 54%, ndërsa mbeten dhe 70 prokurorë ende në proces. “Në vitin 2022, nga vetingut në total janë konfirmuar 91 prokuror, u shkarkuan 50. Që prej nisjes së vetingut u dorëhoqën 21 prokuror, 11 kanë dalë në pension”, tha Balla. Kreu i Këshillit të Lartë të Prokurorisë, shtoi se janë 8 prokurorë të cilët kërkuan mbrojtje për jetën gjatë vitit 2022. “U morën masat për mbrojtjen e tyre. Sot prokurorët më të mbrojtur se kurrë”, tha Balla.