Vizita e zyrtarëve të BE, reagon ambasadorja Kim: SHBA mbështet integrimin e Shqipërisë, asistencë për reformat

Shtetet e Bashkuara të Amerikës e shohin ecjen e Shqipërisë drejt Bashkimit Evropian si një moment vlerësimi për reformat e vështira të ndërmarra. Ambasadorja e SHBA në Tiranë, Yuri Kim teksa përshëndet mbajtjen për herë të parë në Tiranë të Këshillit të Stabilizim Asocimit Shqipëri-BE thotë në një postim në Tëitter se shqiptarët dhe Qeveria meritojnë respekt.“Shumë mirë të shohësh Shqipërinë teksa ecën përpara në rrugën e saj drejt anëtarësimit në Bashkimin Evropian. Njerëzit dhe qeveria e Shqipërisë meritojnë respekt pasi kanë ndërmarrë ndryshime të vështira deri tani. SHBA do të vazhdojë të mbështesë fuqishëm progresin e Shqipërisë për t'u bërë Shtet Anëtar i BE-së, duke përfshirë përpjekjet për të zbatuar reformat e nevojshme”, shkruan Kim, krah një postimi të Shefit të diplomacisë së Bashkimit Evropian, Josep Borrell, për takimin e dy ditëve më parë në Tiranë. Për herë të parë, në Tiranë u mbajt mbledhja e Këshillit të Stabilizim Asocimit mes Bashkimit Evropian dhe Shqipërisë, që solli në kryeqytet edhe dy zyrtarët e lartë të BE-së, Josep Borrell dhe Oliver Várhelyi. Takimi u pasua me një konferencë për shtyp mes Ramës dhe zyrtarëve të lartë, të cilët mbajtën edhe njëherë qëndrimin e qartë se vendi i Shqipërisë është në Bashkimin Europian. Ndërkohë, kujtojmë se ambasadorja e SHBA-së në Tiranë, Yuri Kim edhe më herët ka deklaruar se SHBA e mbështet Shqipërinë në rrugëtimin e saj në Bashkimin Europian.