Zbardhet dosja e plotë në SPAK për Ilir Beqajn, nga konflikti i interesit mes biznesmenin  Ilir Rrapaj, tek shkelja e procedurave në dhënien e koncesionit të “Sterilizimit”, prokurorët specialë fusin në “skaner” pasuritë e ish-ministrit të Shëndetësisë

Gjykata e Posaçme ka caktuar mesditën e sotme për seancën e marrjes në pyetje të ish-ministri i Shëndetësisë, Ilir Beqja, ndaj të cilit janë vendosur masat e sigurisë detyrim paraqitje dhe ndalim dalje jashtë shtetit, për shkak të hetimeve për koncesionin e sterilizimit. Seanca do të drejtohet nga gjyqtari i hetimeve paraprake, Erjon Bani pas kërkesës që është bërë nga vetë prokuroria e Posaçme. Masat e sigurisë për Beqajn u miratuan nga Gjykata e Posaçme më 16 nëntor, bazuar në kërkesën e prokurorisë. Deri tani nga hetimi i SPAK ai është zyrtari më i lartë nën akuzë për shkeljet e konstatuara me kontratën e partneritetit publik-privat të sterilizimit me vlerë 100 milionë euro, pas arrestimit në gusht të këtij viti të biznesmenit Ilir Rrapaj dhe zëvendësit të tij në Ministrinë e Shëndetësisë, Klodian Rrjepaj. Hetimet e SPAK kanë zbuluar shkelje në procedurat e dhënies së koncesionit, siç dyshohet me qëllimin e vetëm të shpalljes fitues të kompanive të Ilir Rrapajt dhe shtetasit Italian, Umbro Staçini.

Detaje nga dosja

Ndërkohë burime bëjnë me dije se nga ana e Ministrisë së Shëndetësisë janë shkelur procedurat e ndjekura për dhënien e konçesionit. Sipas SPAK, procedura e  hapur me negocim, është në shkelje të ligjit pasi në atë kohë legjislacioni parashikon procedurë të hapur dhe jo me negocim, në mënyrë që të kishin mundësi edhe kompani të tjera të merrnin pjesë. Sipas organit të akuzës shkeljen e ligjit për mënyrën si janë bërë procedurat, në cilësinë e ministrit Ilir Beqaj duhet që t’i kishte konstatuar. Po ashtu si ministër i Shëndetësisë Beqaj duhet të kishte konstatuar konfliktin e interesit mes biznesmenit Ilir Rrapaj dhe zëvendësit të tij Klodian Rrepaj. Një tjetër shkelje sipas SPAK është edhe fakti që në cilësinë e titullarit Ilir Beqaj duhet të kishte konstatuar se nga procedurat koncesionare janë fryrë kostot nga ana e Bashkimit të Operatorëve Ekonomikë që mori përsipër të bënte sterilizimin e seteve kirurgjikale. Në bazë të hetimeve me prova shkresore, SPAK ka dyshime se kompania që fitoi koncesionin është favorizuar nga anëtarët e Komisionit të Vlerësimit të Ofertave dhe kjo gjë është lejuar edhe nga ish-ministri Beqaj. Ai akuzohet për veprën penale të shpërdorimit të detyrës e kryer në bashkëpunim dhe ndaj tij është caktuar masa “detyrim paraqitje” dhe “ndalim për daljen jashtë vendit”. Sakaq, kujtojmë se në dosjen e parë për koncesionin e sterilizimit të seteve kirurgjikale, SPAK ka konstatuar edhe lidhjen mes Beqaj dhe biznesmenit Ilir Rrapaj. Ata kanë udhëtuar disa herë së bashku në drejtim të Italisë dhe Vjenës. Po ashtu ka pasur edhe shkëmbime  mesazhesh në e-mail midis tyre. Por veç hetimeve për korrupsion, “Pabarazi në tendera” dhe “Shpërdorim detyre”, mësohet se prokuroria e Posaçme SPAK, ka nisur një hetim paralel, me qëllim gjurmimin e pasurisë së ish-ministrit të Shëndetësisë, Ilir Beqaj. Nga ana tjetë r, vendimi i Gjykatës së Posaçme për Korrupsion dhe Krimin e Organizuar me urdhër të SPAK për ish-ministrin e Shëndetësisë, Ilir Beqaj ka marrë vëmendjen e mediave ndërkombëtare. Rrjeti amerikan ABC Neë s dhe Associated Press shkruajnë se ish-ministri i shëndetësisë i Shqipërisë, i cili po hetohet për korrupsion të dyshuar, duhet të raportojë në polici dhe i është ndaluar largimi nga vendi. Abc Neë s shkruan në artikullin e saj se Prokurorët e Gjykatës Speciale Kundër Korrupsionit dhe Krimit të Organizuar të vendit thanë se Ilir Beqaj duhet të paraqitet në prokurori çdo të premte dhe nuk mund të përdorë pasaportën ose kartën e identitetit për t'u larguar nga vendi.