Zvarritet sërish "Dosja 184", mungesa e avokatëve shtyn leximin e konkluzioneve, të pandehurit i justifikojnë

Mungesa e radhës e avokatëve të të pandehurve Robert Aga dhe Hasan Hoti u bë shkak për shtyrje të seancës në të cilën pritet të lexohen konkluzionet e mbrojtjes. Seanca e gjyqit për “Dosjen 184” në të cilën do të lexoheshin qëndrimet përfundimtare të mbrojtjes e planifikuar për dje u shty pasi dy avokatët e të pandehurve mungonin. Gjyqtarja Nertila Kape mësoi që në fillim të seancës se avokatët Gentian Rumano dhe Petrit Ismaili nuk ishin të pranishëm. Të pandehurit në këtë çështje, ish-shefi i komisariatit Robert Aga dhe ish-administratori Hasan Hoti, i thanë gjyqtares se Rumano ishte i angazhuar në një gjyq tjetër në Tiranë, ndërsa avokati Petrit Ismaili u pretendua se nuk kishte arritur të shkonte në gjykatë pasi makina e tij kishte pësuar defekt në rrugë. Të pandehurit kërkuan kohë që të paraqesin me shkrim konkluzionet e mbrojtjes, në seancën e ardhshme. Gjyqtarja caktoi datën 7 shkurt si ditë për këtë seancë. Në seancën para ardhëse prokuroria e Dibrës kërkoi dënime me kusht për ta. Konkretisht 3 vjet burg të konvertuar në 4 vjet shërbim prove për ish-shefin e komisariatit të policisë Peshkopi Robert Aga dhe përjashtimin nga mbajtja e posteve publike për 2 vjet. Për Hasan Hotin, ish-drejtues i njësisë administrative Lurë u kërkuan 2 vjet burg të konvertuar në 3 vjet shërbim prove dhe 2 vjet përjashtim nga mbajtja e detyrave publike. Dosja 184, me përgjime që implikojnë disa persona, përfshi të pandehurit e mësipërm, në manipulimin dhe blerjen e votës në zgjedhjet e pjesshme të vitit 2016 në favor të kandidatit të mbështetur nga Partia Socialiste, u zvarrit mes prokurorive të Dibrës, asaj të Krimeve të Rënda dhe SPAK për gati 5 vjet. Ajo  u dërgua në gjykatë në fund të vitit 2020 vetëm për 4 të pandehur dhe në 12 shkurt 2021 Gjykata e Dibrës e kaloi për gjykim. Dosja më pas u nda në dy pjesë, të pandehurit Drini Gjeci dhe Nuri Meda, kërkuan gjykim të shkurtuar. Ata u dënuan në dhjetor 2022 pas dy viteve zvarritje të procesit. Gjeci u dënua me 8 muaj burg të konvertuar në 120 orë punë publike, ndërsa Meda u dënua me 8 muaj burg të konvertuar në 16 muaj dënim me kusht.