Zyrtarizohet kandidati i dytë i Alibeajt për zgjedhjet vendore të 2023, Ilirian Koxhajn vetofrohet për Bashkinë e Kuçovës dhe kërkon rikthimin e Bashës

Pas Agron Kapllanajt për Bashkinë e Fierit, grupi i Alibeajt ka shpallur edhe një tjetër kandidat për zgjedhjet lokale të 14 Majit 2023. Bëhet fjalë për Ilirian Koxhajn, i cili do të kandidojë për bashkinë e Kuçovës, ndërsa ka lënë të nënkuptohet se dëshiron rikthimin e Lulzim Bashës.  Gjatë një intervistë për mediat, Koxhaj deklaroi se shpreson që të gjendet gjuha për të dalë me një kandidat në zgjedhjet e 14 majit, por theksoi se nuk do të tërhiqet në asnjë rast nga gara. Ai tha se iu bashkua grupimit “Alibeaj” nga që beson se Shqipëria ekziston falë mbështetjes së SHBA-ve. Koxhaj shtoi se ka respekt për të kaluarën e Berishës, por ka ardhur koha për lidership të ri. “Duhet të bëjmë ndarjen nga ato 30 vjet, që kemi mbetur në tranzicion. Dua të kemi një lidership të ri, një frymë të re, jo një frymë përçarëse. Unë kandidoj  sepse dua të jem pjesë e një partie vlerash dhe jo pjesë e një partie të lidhur direkt me kryetarin. Nëse do shkonim pas një individi të vetëm nuk jemi në demokraci, me gjithë respektin që kam për z.Berisha. Nuk ia mohoj vlerat, por çdo gjë ka një fund. Besoj dhe kam akoma shpresë që PD do gjej kanale komunikimi që mos jemi me dy kandidatë, por me një të vetëm. Deri në 30 mars besoj se do jemi me një kandidat të vetëm. Kemi pësuar një frakturë, por besoj se do të rikuperohet shpejt. Besoj që PD ka forcë, burime njerëzore, arsye, që të bashkohen përsëri, që të kuptojmë që kundërshtari ynë i vetëm sot është Edi Rama”, deklaroi ai. Ndërkohë ai theksoi se nuk ka komunikim me Bashën, por shtoi se në një moment të dytë njerëzit dhe koha mund të kërkojnë rikthimin e tij. “Nuk kam qenë në komunikim me z.Basha. Nuk i shërbej një personi të vetëm, i shërbej PD-së, bashkëqytetarëve të mi. Edhe me z.Alibeaj, përveç atij në Kolegjin e Kryetarëve s’kam pasur takime të tjera. Ai e ka bërë vet të qartë. Është tërhequr një hap mbrapa. Ndoshta në një moment të dytë, vetë njerëzit, vetë koha do ta kërkojë rikthimin e tij. Por nuk shoh që z.Basha të jetë aktiv, shoh që z.Alibeaj ka marrë pozitat e drejtuesit, dhe e shoh në pozitë të mirë. Jam optimist se njerëzit do dinë të vendosin, të bëjnë diferencën, 14 maji do ndajë dy botë për shqiptarët”, nënvizoi Koxhaj.