Alarmi për luftë “mobilizon” NATO, Stoltenberg vizitë blic në Ballkan, ja çfarë pritet nga turi i tij

Rusia po tenton të hapë një vatër lufte në Ballkan. Kjo ka qenë kryefjala e zhvillimeve të fundit në rajon, që ka mobilizuar edhe vetë NATO-n. Kreu i aleancës, Jens Stoltenberg, do të zhvillojë një tur takimesh në rajon, duke i dërguar mesazh Moskës se NATO nuk do të lejojë asnjë lloj konflikti. Nesër ai do të udhëtojë në Bosnje dhe Hercegovinë, ku do të ketë një darkë pune me anëtarët e Presidencës. Të hënën do të takohet me Përfaqësuesin e Lartë për Bosnje dhe Hercegovinën, Christian Schmidt. Stoltenberg do të vizitojë selinë e NATO-s në Sarajevë. Në të njëjtën ditë, sekretari i Përgjithshëm do të vazhdojë udhëtimin e tij në Kosovë, ku do të ketë diskutime me presidenten Vjosa Osmani sidhe kryeministrin Albin Kurti. Stoltenberg gjithashtu do të vizitojë kampin Nothing Hill të KFOR-it të NATO-s, ku do të takohet me komandantin e KFOR-it, gjeneralmajor Uluta?. Ai do të takohet gjithashtu me Drejtorin e Ekipit Këshillues dhe Ndërlidhës të NATO-s, gjeneral brigade Hammerstein.

Të martën, më 21 nëntor, sekretari i Përgjithshëm do të jetë në Beograd, ku do të  ketë takime me presidentin e Serbisë, Aleksandër Vuçiç dhe kryeministren Ana Brnabiç. Më vonë atë ditë, Stoltenberg do të udhëtojë në Maqedoninë e Veriut, për t’u takuar me presidentin Stevo Pendarovski dhe kryeministrin Dimitar Kovaçevski, dhe me kryetarin e Kuvendit të Maqedonisë së Veriut, Talat Xhaferi. Të mërkurën, më 22 nëntor, sekretari i Përgjithshëm do të marrë pjesë në një takim me liderët aleatë nga rajoni. Kryeministri i Shqipërisë, Edi Rama, presidenti i Kroacisë, Zoran Milanoviç, kryeministri i Malit të Zi, Milojko Spajiç dhe kryeministri i Sllovenisë, Robert Golob, janë ftuar të marrin pjesë.