Albin Kurti: Në dhjetor Kosova do të dorëzojë aplikimin për anëtarësim në BE

Kryeministri i Kosovës Albin Kurti ka thënë në intervistë se Prishtina po llogarit në mbështetjen e miqve të saj që sa më shpejt të votohet për pranimin e saj në Këshillin e Evropës. “Përveç kësaj, në dhjetor do të dorëzojmë zyrtarisht një aplikim për anëtarësim në Bashkimin Evropian. Natyrisht ne e dimë se anëtarësimi nuk do të vijë në të ardhmen e afërt. Megjithatë, është e rëndësishme që ne zyrtarisht, zyrtarisht dhe publikisht të tregojmë dëshirën tonë për t'u pranuar në BE”, tha Kurti. Ky lajm do të jetë një surprizë e hidhur për Serbinë. Si Vuçiç dhe Ana Bërnabiç, kryeministrja e Serbisë është e sigurt se në të ardhmen do të ketë më shumë shtete që do ta tërheqin njohjen e pavarësisë së Kosovës. Sipas pretendimeve të saj, shtimi i numrit të shteteve është treguesi më i mirë se Serbia në politikën e saj të jashtme ka ndjekur një strategji të qëndrueshme dhe të mirëplanifikuar. Për Bërnabiç përveç çnjohjeve, Serbia fal strategjive lobuese ka arritur ta dobësojë pozicionin e Kosovës në raport me anëtarësimin e saj në organizatat ndërkombëtare. Edhe pse prej vitesh zyrtarët më të lartë shtetëror serb pretendojnë që kanë siguruar një numër të konsiderueshëm të çnjohjeve, në fakt në terren situata është krejt ndryshe. Së fundmi ishte presidenti i Serbisë, Aleksandër Vuçiç, ai i cili tha se në sirtar ka çnjohjen e radhës së pavarësisë së Kosovës. Rrëfimi i liderëve shtetërorë serbë, se janë siguruar numra të konsiderueshëm të shteteve që janë të gatshëm ta çnjohin shtetësinë e Kosovës, u ri aktualizua, kur Kosova dorëzoi zyrtarisht anëtarësimin e saj në Këshillin e Evropës. Por, që nga atëherë deri më tani asnjë shtet i cili e ka njohur më herët pavarësinë e Kosovës, nuk e ka tërhequr atë.