Austria “godet” Ballkanin e Hapur nga Beogradi, kërkon marrëveshje graduale ndërmjet Kosovës e Serbisë dhe vazhdimin e Procesit të Berlinit

Ministri i Jashtëm i Austrisë Alexander Schallenberg ka dhënë mesazhe të rëndësishme në Beograd për Ballkanin Perëndimor. Ai ka deklaruar se normalizimi gradual i marrëdhënieve ndërmjet Beogradit dhe Prishtinës është shumë i rëndësishëm. Sipas mediave serbe që kanë transmetuar fjalët e tij, Schalenberg ka bërë dallim mes “normalizimit të marrëdhënieve” dhe “marrëveshjes gjithëpërfshirëse që do të çojë në njohje reciproke” duke thënë se normalizimi është qëndrim i BE’së. Kryediplomti austriak ka folur për normalizim gradual të marrëdhënieve ndërmjet Kosovës dhe Serbisë. “Nëse flasim për stabilitetin rajonal, normalizimi gradual i marrëdhënieve ndërmjet Beogradit dhe Prishtinës është shumë i rëndësishëm. Më vjen mirë që presidenti Aleksandër Vuçiç tha të premten se do të përpiqet të bëjë përparim. Dialogu është një vrimë gjilpëre përmes së cilës vëzhgohet rajoni dhe kjo është arsyeja pse është e rëndësishme”, tha ai. “Procesi i normalizimit duhet të vazhdojë, dialogu ndërmjet Beogradit dhe Prishtinës. Hap pas hapi drejt normalizimit, sepse është në interes të stabilitetit në rajon”, tha Schalenberg. Duke folur rreth bashkëpunimit rajonal, Schalenberg tha se bashkëpunimi dhe stabiliteti rajonal janë të rëndësishëm, duke bërë thirrje se është e rëndësishme që të ketë një treg rajonal. Ai shprehu mirënjohjen për Gjermaninë dhe kancelarin Olaf Scholz për vazhdimin e Procesit të Berlinit, sepse, tha ai, ishte inkubatori në të cilin ishin krijuar idetë e bashkëpunimit. Në konferencën për media me homologun e tij serb, Schalenberg ka thënë se Bashkimi Evropian dhe askush tjetër është shtytësi kryesor i stabilitetit dhe bashkëpunimit në rajon.