Biden “ping-pong” me Netanyahun për reformën gjyqësore: Të heqë dorë, nuk e ftoj në Shtëpinë e Bardhë

Presidenti i SHBA Joe Biden dhe kryeministri izraelit Benjamin Netanyahu duket se kanë nisur një “luftë fjalësh” në distance dhe “molla e sherrit” është bërë pikërisht reforma gjyqësore, që i nxori izraelitët në rrugë, për ta kundërshtuar. Biden i bëri thirrje Netanyahu-t që të heqë dorë nga legjislacioni i tij aktual i rishikimit gjyqësor, duke thënë se ai ishte "shumë i shqetësuar" për demokracinë izraelite dhe duke e paralajmëruar se Izraeli nuk mund të vazhdojë në këtë rrugë. "Shpresojmë se kryeministri do të përpiqet të arrijë një kompromis të vërtetë, por kjo mbetet për tu parë," tha Biden. Po ashtu, ai dha një "Jo" të prerë kur u pyet nëse do ta ftonte Netanyahun në Shtëpinë e Bardhë, duke shtuar: “Jo tani afër”. I pyetur nëse kishte folur me kryeministrin izraelit në telefon për situatën, Biden mohoi, por tha se i kishte dërguar njëmesazh përmes ambasadorit. Presidenti amerikan nuk la pa sqaruar që nuk po ndërhynin në punët e Izraelit, pasi sipas tij të gjithë e dinin qëndrimin e Amerikës dhe amerikanëve. Mirëpo, Netanyahu u përgjigj shpejt, duke këmbëngulur se ai po kërkonte të rivendoste ekuilibrin e duhur midis tre degëve të qeverisë përmes konsensusit. Duke kundërshtuar Biden, kryeministri deklaroi se Izraeli nuk do të merrte vendime bazuar në presionin e jashtëm, madje edhe nga miqtë më të mirë. Pas një udhëtimi jashtë Uashingtonit, Biden iu rikthye çështjes, duke thënë se priste që Netanyahu të hiqte dorë përfundimisht nga legjislacioni, jo vetëm ta shtynte atë.Kjo reformë, që ka shkaktuar trazira në Izrael, mendohet që do të kufizojë autoritetin e Gjykatës së Lartë dhe do t’u japë politikanëve kompetenca më të mëdha mbi përzgjedhjen e gjyqtarëve.