Borrell kritika për Kurtin dhe Vuçiçin: Përvishuni punës, mos i drejtoni gishtat njëri-tjetrit

Përfaqësuesi i Lartë i Bashkimit Evropian për Politikë të Jashtme, Josep Borrell tha dje se çdo përpjekje për ta vënë në dyshim marrëveshjen e Ohrit është e kotë. Përmes një deklarate për shtyp para fillimit të Samitit të liderëve të BE-së, Borrell tha se palët kanë rënë dakord, marrëveshja duhet të zbatohet dhe nuk ka vend për të vënë në dyshim. “Çdo përpjekje për të vënë në dyshim marrëveshjen është e kotë. Marrëveshja është rënë dakord, duhet të zbatohet dhe nuk ka vend për ta vënë në mëdyshje…”, tha Borrell. Sipas tij, marrëveshja është një tërësi dhe duhet të zbatohet nga të gjitha palët. “Është një tërësi, duhet të zbatohet nga të gjitha palët, në mënyrë tërësore dhe ne do të ndjekim me vëmendje kush zbaton e kush jo. Unë do t’i këshilloja që të mos targetojnë askënd, por të bëjnë punën e tyre”, tha shefi i Politikës së Jashtme të BE-së. Kujtojmë se të shtunën më 18 mars, në Ohër të Maqedonisë së Veriut, pas 12 orë negociatash mes kryeministrit të Kosovës, Albin Kurti dhe presidentit të Serbisë Aleksandër Vuçiç, është arritur marrëveshja mbi Aneksin e zbatimit të Planit evropian për dialogun, por pa nënshkrim të palëve. Udhërrëfyesi për zbatimin e planit evropian parasheh që të dyja vendet të angazhohen plotësisht për t’i respektuar të gjitha nenet e Marrëveshjes dhe Aneksin e saj. BE e ka quajtur si shumë të suksesshëm takimin. Por, edhe kësaj radhe nuk kanë munguar interpretimet e ndryshme të palëve rreth asaj se çfarë marrëveshje është arritur. Mosnënshkrimi i dokumentit ka nxitur mëdyshje në opinion, nëse marrëveshja e Ohrit mund të cilësohet ligjërisht e detyrueshme, ndaj dhe reagimi i Borrell duket se është përgjigje pikërisht për këtë.