Deklarata e fortë e ambasadorit të Ukrainës në Serbi: Rusia e sheh Ballkanin si “front rezervë”, ja çfarë po përpiqet të bëjë

Ambasadori i Ukrainës në Serbi, Volodymyr Tolkach, ka deklaruar ditën e sotme se Moska e sheh Ballkanin si “front rezervë”.

“Rusia e sheh Ballkanin si një “front rezervë” që Kremlini do të përpiqet ta destabilizojë për të larguar vëmendjen nga agresioni kundër Ukrainës dhe jam i bindur se Serbia dhe vendet e rajonit nuk kanë nevojë për një të ardhme të tillë. Ukraina është mirënjohëse ndaj udhëheqjes serbe për mbështetjen e saj politike dhe dënimin e agresionit rus kundër Ukrainës në organizatat ndërkombëtare”, është shprehur ai.

Tolkac theksoi se mes Ukrainës dhe Serbisë ka lidhje të thella miqësore, historike dhe kulturore, por se i bashkon edhe zgjedhja e përbashkët e së ardhmes në rrugën evropiane.

Sipas tij, Rusia moderne është një kërcënim jo vetëm për Ukrainën, por edhe për Evropën, përfshirë Serbinë.

“Përgjigja jonë ndaj kërcënimit rus, përgjigja e Bashkimit Evropian, e vendeve kandidate, përfshirë Serbinë, duhet të jetë e fortë. Bëhet fjalë për mbrojtjen e zgjedhjes sonë të lirë të përbashkët, të së ardhmes sonë.

Prandaj, ne shpresojmë të forcojmë mbështetjen e Serbisë për Ukrainën.

Rusia padyshim do t’i rezistojë aspiratave evropiane, si tonat ashtu edhe të Serbisë, por ne tashmë kemi bërë një zgjedhje dhe jemi të sigurt se do ta mbrojmë atë së bashku”, theksoi Tolkac.

Ambasadori ka shtuar se ai “duhet të deklarojë” se propaganda shtetërore ruse është ende fuqishëm e pranishme në hapësirën informative të Serbisë.

“Këtu nuk bëhet fjalë për lirinë e fjalës, qeveria ruse e vrau lirinë e fjalës në Rusi shumë kohë më parë. Ashtu siç vrau idealet e ukrainasit Çajkovskit dhe rusit Lermontov, të cilat propaganduesit rusë i përmendin ndonjëherë. Prandaj, përhapja e narrativave të propagandës shtetërore ruse në Serbi nuk është aspak liri e fjalës. Ky nuk është aq problem për Ukrainën, sa për Serbinë”, theksoi Tolkac.

Duke komentuar njoftimin për vizitën e ministrit të Jashtëm rus Sergei Lavrov në Beograd dhe anulimin e saj, Tolkach vlerësoi se do të ishte më mirë të përpiqej të shkonte drejtpërdrejt në Hagë.