Deklarata e fortë e Brnabiç: Albin Kurti po dobëson pozicionin e tij sa herë i thotë ‘jo’ formimit të Asosacionit

Kryeministrja e Serbisë, Ana Branbiç, u shpreh dje se këmbëngulja e Beogradit për formimin e Asociacionit të Komunave me Shumicë Serbe e forcon pozitën e vendit të saj, por e dobëson pozitën e kryeministrit të Kosovës, Albin Kurtit, sa herë që ai thotë “jo” themelimit të Asociacionit. Duke e komentuar deklaratën e Kurtit, se Asociacioni do të formohet, por vetëm pas arritjes së marrëveshjes finale me Serbinë për njohje reciproke, Brnabiç kujton se formimi i Asociacionit është pjesë e Marrëveshjes së Brukselit nga viti 2013. “Vuçiç fitoi Asociacionin me të gjitha kompetencat me Marrëveshjen e Brukselit dhe tani mund të shihni se sa e zgjuar është kjo politikë në planin afatgjatë”, tha Brnabiç. Ajo theksoi se si ata që e “dashurojnë” Vuçiçin dhe ata që “nuk e pëlqejnë atë” duan që ai të vazhdojë sa më gjatë të udhëheqë Serbinë, duke shtuar se shpreson që kështu të jetë. “Ai tha se e di se çfarë është detyra e tij dhe gjithmonë do të heqë dorë nga pozita e tij para Kosovës, gjë që nuk është rasti me asnjë politikan opozitar të cilin e kemi dëgjuar dy ditët e kaluara në Kuvend. E vetmja gjë e rëndësishme për ta është që të jenë në pushtet”. Por, sipas kryeministrit të Kosovës, vullneti i popullit të Kosovës, kushtetutshmëria dhe ligjshmëria janë ato që e shtyjnë personalisht atë që të kërkojë fillimisht njohjen e pavarësisë së Kosovës nga Serbia e më pastaj formimin e çfarëdolloj Asociacioni të Komunave me Shumicë Serbe. “Të kërkosh Asociacionin pa e njohur Kosovën është si të kërkosh një kafe pa filxhan”, ka thënë Kurti. Kryeministri kosovar, po ashtu ditë më parë nga foltorja e Kuvendit ka listuar gjashtë parakushte që duhet plotësohen para se të themelohet kjo strukturë e re qeverisëse brenda Kosovës.