Del përfundimisht “jashtë loje” Ballkani i Hapur, aktivizohet Procesi i Berlinit, ministrat e brendshëm të Ballkanit Perëndimor takohen në Gjermani

Gjermania ka nxjerrë jashtë loje nismën e përbashkët midis Shqipërisë, Serbisë dhe Maqedonisë së Veriut e quajtur “Ballkani i Hapur” duke i dhënë një goditje direkte kryeministrit shqiptar Edi Rama, president serb Aleksandër Vuçiç dhe kryeministrit maqedonas Dimitar Kovaçevski. Sinjalet i dha lëvizja e fundit e kancelarit Scholz. Ministrat e Brendshëm të vendeve pjesëmarrëse në Procesin e Berlinit u takuan në kryeqytetin gjerman me ftesë të ministres federale të Brendshme Nensi Feser në kuadër të përgatitjeve për samitin e Berlinit që pritet të mbahet në 3 nëntor. Temat kryesore të takimit të ministrave të brendshëm ishin migracioni i paligjshëm, lufta kundër korrupsionit dhe krimit të organizuar dhe riatdhesimi i shtetasve që ishin rekrutuar në Siri. Në takimin në Berlin morën pjesë përfaqësues të Bashkimit Evropian dhe përfaqësues të organizatave ndërkombëtare. Çfarë rëndësie ka projekti gjerman për rajonin? Së pari, ky projekt tregon angazhimin e BE ndaj vendeve të Ballkanit Perëndimor dhe integrimit të tyre. Procesi i Berlinit, ndryshe nga Ballkani i Hapur është ideja e një tregu të përbashkët të vendeve të rajonit, e cila merr kuptim vetëm nën kornizën e Bashkimit Evropian. Si qëllim final jo vetëm i Procesit të Berlinit, por edhe i politikës së zgjerimit të Bashkimit Evropian, është integrimi i plotë i vendeve të rajonit tonë në strukturat e BE. Integrimi i plotë do të thotë integrim politik dhe ekonomik. Tregu i përbashkët i vendeve të rajonit do të jetë i përbashkët vetëm në kuptimin evropian të fjalës, pra kur i gjithë rajoni të jetë pjesë e Bashkimit Evropian, ku risjellim në vëmendje dhe deklaratën nga Shtetet e Bashkuara, të cilët thanë qartë se nuk mund të ketë Ballkan të Hapur nëse nuk janë bashkë të gjitha vendet e rajonit.