Dodik raporton tek Vladimir Putini: Po na bëhet presion për t’iu vendosur sanksione

Presidenti ultra-nacionalist i Republikës Srpska Millorad Dodik është takuar ditën e djeshme me presidentin e Federatës Ruse, Valdimir Putin. Ai i ka thënë liderit rus se beson se “Rusia u detyrua të ndërmarrë një operacion ushtarak në Ukrainë”. “Ne mendojmë se Federata Ruse, e cila me këmbëngulje luftoi për kuadrin e saj të sigurisë dhe u përpoq t’i jepte ato garanci më parë, thjesht u detyrua në lidhje me këtë operacion ushtarak”, ka thënë Dodik. Pas agresionit rus në Ukrainë, vendet Perëndimore i vendosen sanksione Rusisë, ndërsa Bosnje e Hercegovina së bashku me Serbinë; janë nga vendet e pakta të Evropës që nuk i janë bashkuar këtyre sanksioneve. Për ta penguar që BeH t’i vendos sanksione Rusisë, ndihmoi presidenti i RS-së, Dodik, duke mos lejuar që të merret një vendim i tillë. Për këtë veprim ai u mburr para presidentit rus, por gjithashtu tek Putin-i ai u ankua se si reaksion i këtij vendimi po përballet me presion nga ndërkombëtarët. “Ne nuk lejuam marrjen e një vendimi formal për sanksione kundër Federatës Ruse dhe për këtë shkak u ekspozuam ndaj formave të ndryshme të presionit nga partnerët tanë perëndimorë në formën e sanksioneve dhe pezullimit të disa projekteve dhe programeve. Por ne vendosëm të mos bëhemi thjesht pjesë e histerisë që po krijohet, por të japim një shans për ta zgjidhur çështjen në nivel të Federatës Ruse dhe Ukrainës”, ka theksuar ai.  Dodik u shpreh se “në RS ata e kuptojnë se Rusia është në konflikt me Perëndimin dhe jo me Ukrainën”. Ndër të tjera, ai u ankua edhe për “shkeljen e marrëveshjes së Dejtoni (1995)” në BeH, duke deklaruar se “RS është e ekspozuar ndaj kërkesave të ndryshme për prishjen e Marrëveshjes së Dejtonit”.