Fondacioni gjerman publikon statutin, asociacioni në Kosovë do të financohet edhe nga Serbia, zbardhen detaje nga draft-rezoluta

Organizata gjermane, Friedrich-Ebert- Stiftung në partneritet me Institutin Europian për Paqe, publikuan një draft-statut të Asociacionit të komunave me shumicë serbe në Kosovë. Mes pikave më të rëndësishme mund të përmendet fakti që formimi i tij duhet të bëhet në bazë të Kushtetutës së Kosovës dhe që të formohet duhet të ketë edhe pëlqimin e qeverisë. Gjithashtu shkruhet se mes financuesve të asociacionit të komunave serbe në Kosovë mund të jetë edhe shteti i Serbisë. Kreu i fondacionit gjerman, Rene Schlee, tha se kjo është vetëm një pikënisje për diskutime. “Objektivi ynë ka synim lehtësimin e diskutimeve duke u bazuar në propozimin konkret. Nuk ka pasur shumë progres, deri sot askush nuk ka prezantuar një propozim konkret”, ka thënë ai. I përbërë nga 7 kapituj dhe 18 nene, ky draft-statut parasheh mënyrën e themelimit, strukturën organizative, marrëdhëniet me autoritetet qendrore, rregullimin ligjor, buxhetin, si dhe aspekte të tjera të funksionimit të këtij asociacioni, përfshirë simbolet. Për krijimin e tij, Kosova dhe Serbia kanë arritur marrëveshje në vitin 2013, në kuadër të dialogut për normalizimin e marrëdhënieve, që zhvillohet në Bruksel. “Në përgjithësi, Asociacioni do të ishte strukturë për komunat me popullatë me shumicë etnike serbe, për të bashkërenditur çështjet dhe shërbimet, si: arsimi, kujdesi shëndetësor, planifikimi urban dhe rural dhe zhvillimi ekonomik lokal me fjalë të tjera, funksionet për të cilat të gjitha komunat në Kosovë janë përgjegjëse”, kanë shkruar Chollet dhe Escobar. Ata kanë thënë se e kundërshtojnë rreptësisht krijimin e çfarëdo etniteti që i përngjan Republikës Sërpska në Bosnje dhe Hercegovinë dhe se bashkësia ndërkombëtare nuk po kërkon të imponojë zgjidhje.