Gjermania dhe Franca të alarmuara për një luftë të re në Ballkan, plani i ri i Berlinit dhe i Parisit që do të sjellë ndryshimin e madh në rajon

E etiketuar shpesh si “hallka më e dobët” e Evropës, Ballkani mund të shndërrohet në një burim të ri trazirash teksa lufta në Ukrainë vazhdon. Të gjithë janë të bindur se integrimi në Bashkimin Evropian do ti japë fund pakënaqësive, por negociatat vazhdojnë të zvarriten. Gjermania dhe Franca “kanë kthyer sytë” ditën e djeshme nga rajoni, duke vënë në pah dy çështjet e ndjeshme për Ballkanin: Rolin e Serbisë lidhur me rreshtimin e saj hapur me Vladimir Putinin dhe integrimi i Ballkanit Perëndimor. Presidenti francez, Emmanuel Macron ka prezantuar ide të reja për zgjerimin e BE-së, ku përmend edhe Ballkanin. Gjithashtu, përfaqësuesi i Lartë i komunitetit ndërkombëtar për Bosnjë-Hercegovinën, Christian Schmidt, paralajmëron se presidenti rus Vladimir Putin mund ta destabilizojë Ballkanin, ndërsa i dërguari special i qeverisë gjermane për Ballkanin Perëndimor, Manuel Sarrazin, tha se “në aspektin ekonomik dhe politik, u shpreh se Serbia “nuk mund të ulet në dy karrige”. “Mbështetja jonë financiare dhe investimet janë më të mëdha. Ne jemi të interesuar edhe për zhvillimin ekonomik dhe social të këtij vendi. Kuptohet që fondet që japim dhe angazhimi ynë në vendet kandidate janë më të mëdha se në vendet që janë p.sh. pjesë e Partneritetit Lindor”, ka thënë ai për gazetën beogradase Danas. Ai theksoi se “është mjaft e qartë se pas sulmit të Rusisë ndaj Ukrainës, pozicioni pro-rus është i papajtueshëm me statusin e kandidatit”. “Nuk mund të ulesh në dy karrige, të cilat janë milje larg njëra-tjetrës. Përveç kësaj, mendoj se Serbia e di shumë mirë se është në interesin e saj që sa më shpejt të largohet nga të gjitha varësitë prej regjimit të paskrupullt”, tha Sarrazin. “Sigurisht që ka edhe pasoja në vendimet e subjekteve ekonomike nëse vendi po ndjek në mënyrë të pakthyeshme një kurs europian apo jo”, paralajmëroi ai. “Është vetëm një çështje e vlerësimit të rrezikut dhe përfitimit. Që nga fillimi i pushtimit rus të Ukrainës, biznesmenët pyesin nëse Serbia, si destinacion investimi, i është bashkuar qëndrimeve evropiane dhe nëse do ta bëjë këtë në të ardhmen. Prandaj është thelbësore që Serbia të mbajë qëndrimin e saj tani”, tha Sarrazin.

Putini po “e ndez” rajonin

Përfaqësuesi i Lartë i komunitetit ndërkombëtar për Bosnje-Hercegovinën , Christian Schmidt paralajmëron se presidenti rus Vladimir Putin ka interes ta ndezë politikisht Ballkanin. “Po ndizet në rajon”, tha ish-ministri gjerman i Bujqësisë për “Rheinische Post”. Ai tha se Putini po përpiqet të përfitojë nga fakti se NATO nuk ka një reputacion të mirë, veçanërisht në Serbi, tha ai. “Sulmet ajrore të synuara e të kufizuara nga aleanca gjatë luftës së Kosovës në vitin 1999, veçanërisht në kryeqytetin Beograd, nuk janë harruar”, tha Schmidt. Përveç kësaj, ai thekson se ekzistojnë marrëdhënie tradicionale mes serbëve dhe rusëve. Christian Schmidt bëri thirrje që të forcohet misioni stabilizues i BE-së “Eufor Althea” në Bosnjë-Hercegovinë. Deri më tani, rreth 2200 ushtarë nga 24 shtete anëtare kanë marrë pjesë, por vetëm rreth 600 janë gjithmonë në terren. “Ne kemi nevojë për më shumë për ta ruajtur besimin në një të ardhme të qëndrueshme dhe paqësore”, tha Schmidt.

Macron me ide të reja për Ballkanin Perëndimor

Presidenti francez, Emmanuel Macron ka shpalosur vizionin e tij për Evropën e të ardhmes, ku përmend edhe Ballkanin Perëndimor.  Presidenti francez propozon krijimin e një komuniteti politik te Evropës si vizion për Evropën e të ardhmes, që do të mundësonte kombeve europiane të ndajnë të njëjtat vlera për sigurinë, paqen, energjinë, transportin, investime të infrastrukturës, të lirisë së lëvizjes dhe të rinjve. “Pjesëmarrja në këtë organizatë nuk paragjykon detyrimisht anëtarësimin në BE, ashtu siç ajo nuk do të mbetej e mbyllur për ata që kanë dalë nga BE”, është shprehur Macron. Ndërkohë, që presidenti francez ka ripërsëritur vizionin për anëtarësimin e Ballkanin Perëndimor në BE. “Ka shtete të Ballkanit Perëndimor që janë angazhuar në rrugën e anëtarësimit dhe ky proces duhet të vazhdojnë me reformat. Këto vende ka një vokacion të qartë”, është shprehur ai. Në konferencën e shtypit, presidenti Macron, ka thënë se vendet e Ballkanit Perëndimor mund të jenë pjesë e këtij komuniteti, ashtu si dhe Britania.