Grupi mercenar rus Wagner: Nuk po rekrutojmë serbë për të luftuar në Ukrainë

Grupi mercenar rus Wagner ka mohuar ditën e djeshme se po rekruton serbë për të luftuar në Ukrainë, një ditë pasi aktivistët ngritën ankesa penale kundër organizatës në Beograd. Midis atyre të përmendur në ankesa ishin ambasadori i Rusisë në Serbi, Alexander Botsan-Kharchenko dhe Aleksandar Vulin, kreu i Agjencisë së Sigurisë dhe Informacionit shtetëror të Serbisë. “Unë nuk rekrutoj serbë”, tha themeluesi i Wagner, Yevgeny Prigozhin në një deklaratë, duke thënë se ai kurrë nuk ka dëgjuar për Botsan-Kharchenko dhe për Vulinin. Në fillim të kësaj jave, presidenti serb Aleksandër Vuçiç tha se Rusia duhet të ndalojë përpjekjet e saj për të rekrutuar serbët për të luftuar përkrah forcave Wagner. Ai tha se faqet e internetit ruse dhe grupet e mediave sociale po publikonin reklama në gjuhën serbe në të cilat grupi Wagner bënte thirrje për vullnetarë. Kujtojmë se së fundmi Disa grupe ruse dhe ukrainase kundër luftës, me një avokat nga Beogradi, kanë ngritur në Prokurorinë e Lartë Publike në Beograd një sërë akuzash penale në lidhje me aktivitetet e grupit ushtarak privat të Rusisë, Wagner. Mercenarët e Grupit Wagner janë akuzuar nga vendet perëndimore dhe ekspertët e Kombeve të Bashkuara për shkelje të shumta të të drejtave të njeriut. Akuzat janë ngritur kundër drejtorit të Agjencisë serbe për Siguri dhe Informim (BIA) Aleksandar Vulin, ambasadorit rus në Serbi, Aleksandar Bocan Harchenko, Qendrës Humanitare ruso-serbe në Nish dhe anëtarëve të organizatës së krahut të djathtë, “Patrulla Kombëtare”. Avokati, Çedomir Stojkoviq, ka theksuar se të gjithë janë duke punuar për të mobilizuar qytetarët e Serbisë për luftë.