Jepet alarmi në Prishtinë, ja lëvizjet sekrete të Serbisë që mund të sjellin kaos në Kosovë

Kryetarja e Komisionit për Mbikëqyrjen e AKI-së, Ganimete Musliu ka deklaruar ditën e djeshme se është krijuar një situatë delikate në komunat veriore, ku Serbia ka angazhuar mekanizmat e saj ilegal për të monitoruar aktivitetin e strukturave të sigurisë së Kosovës. Më tej, ajo ka bërë të ditur se më të rrezikuarat janë lagjja e Boshnjakëve, Kroi i Vitakut dhe Kodra e Minatorëve. Deputetja e PDK-së ka theksuar se është njoftuar se Serbia përmes strukturave të saj po bën përpjekje për të rritur gatishmërinë te serbët lokal në raste tensioni. “Konstatojmë se gjendja e përgjithshme në vend në përgjithësi është e qëndrueshme. Situata më e brishtë në Republikën e Kosovës paraqitet në kuadër të katër komunave në veri, për shkak të ndërhyrjeve nga Serbia dhe aktiviteteve të shtuara të strukturave ilegale, grupeve kriminale dhe organizatave të ndryshme radikale. Fatkeqësisht Serbia, përmes strukturave të saj po bën përpjekje për të rritur gatishmërinë te serbët lokal me qëllim të tensionimit të situatës në Kosovë”, ka thënë ajo. Musliu para mediave ka theksuar se investimet nga Serbia paraqesin kërcënim në rritje, pasi që me këtë po investojnë në grupet kriminale serbe në Kosovë. “Serbia ka angazhuar mekanizmat e saj ilegal për të monitoruar aktivitetin e strukturave të sigurisë në Kosovë”, deklaroi Musliu. Gjithsesi këto paralajmërime janë alarmante, ku edhe kërkohet një veprim dhe koordinim i institucioneve të drejtësisë dhe sigurisë. Kujtojmë se situata në Ukrainë e ka bërë edhe më të rrezikshme këtë situatë, pasi presidenti rus Vladimir Putin mbështetet fuqishëm nga presidenti serb Aleksandër Vuçiç. Ndërkombëtarët kanë kthyer sytë nga Ballkani për të parandaluar çdo skenar destabiliteti.