Liderët europianë mblidhen sërish në Bruksel më 13 dhjetor, çfarë pritet nga samiti i radhës BE-Ballkani Perëndimor

Rreth një vit pasi liderët europianë u mblodhën në Tiranë, më 6 dhjetor, ata do të takohen në Bruksel, më 13 dhjetor, sipas njoftimit të BE-së në faqen zyrtare. Ky samit i paraprin samitit të Këshillit Europian, i cili do të zhvillohet më 14 dhe 15 dhjetor 2023 në ndërtesën Europa në Bruksel. Megjithatë ende nuk dihen detaje, dhe as axhenda e këtij samiti, që me siguri do të zbulohen pas pak ditësh.  Dy ditë më parë në Bruksel u mbajt një takim ministror BE-Ballkani Perëndimor, që mblodhi ministrat e jashtëm të BE-së dhe homologët e tyre nga Ballkani Perëndimor. Ky takim u kryesua nga Përfaqësuesi i Lartë për Punët e Jashtme dhe Sigurisë, Josep Borrell. Borrell nënvizoi rëndësinë e unitetit dhe bashkëpunimit të fortë me partnerët e Ballkanit Perëndimor për të ndërtuar qëndrueshmëri dhe për të promovuar paqen dhe stabilitetin në kontinent. Në këtë kontekst, kujtoi se Bashkimi Evropian mbështet te vendet kandidate si partnerë të besueshëm në politikën e jashtme, të sigurisë dhe të mbrojtjes, përfshirë edhe kur bëhet fjalë për përafrimin me vendimet e BE-së në këto fusha. Kujtojmë se 6 dhjetori i 2022 shënoi një datë historike në Tiranë, ku për herë të parë në një vend të Ballkanit Perëndimor u zhvillua  samiti i BE dhe kryeqyteti shqiptar u bë qendra e pritjes e të gjithë liderëve të Evropës dhe Rajonit. Ishte vetë kryeministri Edi Rama, i cili priti personalisht të gjithë liderët një e nga një, teksa i drejtoheshin sallës së mbledhjes për samitin e BE-Ballkani Perëndimor. Gjatë këtij samiti u firmos edhe marrëveshja për Roaming, që parashikon tarifa më të ulëta për qytetarët e Ballkanit dhe BE në vendet respektive, ndërsa do të nisi zbatimin nga 1 tetorit 2023.