Ministrja gjermane jep lajmin e shumëpritur: Vizat për Kosovën do të liberalizohen brenda këtij viti

Liberalizimi i vizave për Kosovën do të ndodh këtë vit. Të paktën kështu deklaroi Ministrja për Europë e Gjermanisë, Anna Lührmann. Lührmann shtoi se procesi i liberalizimit të vizave mund të ndodh para vitit të ri. Muajin e kaluar Franca, Gjermania dhe Polonia, kanë rikonfirmuar angazhimin e tyre të plotë dhe të qartë ndaj perspektivës së anëtarësimit në Bashkimin Europian për gjashtë vendet e Ballkanit Perëndimor. Franca, Gjermania dhe Polonia përmes një deklarate të përbashkët thanë se mbështesin plotësisht BE-në që udhëhoqi dialogun Kosovë-Serbi dhe kanë theksuar nevojën për një marrëveshje gjithëpërfshirëse që i mundëson Kosovës dhe Serbisë të avancojnë në rrugët e tyre respektive europiane dhe të kontribuojnë në stabilitetin në rajon. Lidhur me këtë, anëtari i Komisionit të Integrimeve Europiane, Agon Batusha, për RTV21 ditë më parë tha se shpresojnë të marrin lajme pozitive pas 13 tetorit. Kujtojmë se Komisioneri Evropian për Migracionin, Çështjet e Brendshme dhe Shtetësinë, Dimitris Avramopoulos pohoi se: “Kosova ka bërë përparim të madh gjatë dy viteve të fundit në përmbushjen e dy kërkesave të mbetura për liberalizimin e vizave. Sot, mund ta konfirmojmë se tashmë janë përmbushur edhe të dy standardet e mbetura, dhe se të gjitha standardet e tjera vazhdojnë të jenë të përmbushura. Gjithashtu, unë pres nga Kosova që të vazhdojë t’i trajtojë sfidat e migrimit dhe të sigurisë, duke përfshirë luftën kundër korrupsionit. Tash, i bëj thirrje Parlamentit Evropian dhe Këshillit që ta miratojnë me shpejtësi propozimin tonë për heqjen e kërkesave për viza për qytetarët e Kosovës. Ky do të jetë një moment i rëndësishëm për Kosovën, për të gjithë rajonin e Ballkanit Perëndimor, dhe për Evropën në tërësi.”