Ndërkombëtarët frikë për destabilizim të Ballkanit, Gjermania jep ultimatumin që të përshpejtohen negociatat për Tiranën dhe Shkupin

Ministrja e Jashtme e Gjermanisë, Annalena Baerbock ka dhënë alarmin për Ballkanin. Gjermania ka dhënë ultimatum të përshpejtohet afrimi i vendeve me Bashkimin Evropian pasi këto vende rrezikohen nga ndërhyrjet ruse dhe kineze.  “Nuk duhet humbur më kohë në përpjekjet për integrim dhe harmonizim, tha Baerbock ditën e djeshme, pas bisedimeve në Berlin me homologen e saj sllovene Tanja Fajon. “Në Ballkan nuk duhet të krijohet asgjë ku Rusia apo aktorë të tjerë mund të vendosen”, tha Baerbock. “Ballkani Perëndimor është gjeografikisht në mes të BE-së. Duhet që përfundimisht t’i sjellim njerëzit e Ballkanit Perëndimor në qendrën tonë politike”, kërkoi Baerbock. Sipas ministres gjermane, Bashkimi Evropian duhet të kishte mbajtur premtimin për hapjen e negociatave të anëtarësimit, veçanërisht me Maqedoninë e Veriut dhe Shqipërinë. “Është në interesin tonë strategjik dhe gjithashtu një çështje e besueshmërisë”. Negociatat me Malin e Zi dhe Serbinë për anëtarësim në BE, janë duke vazhduar. Në mars të vitit 2020, Këshilli Evropian u pajtua për hapjen e negociatave të anëtarësimit me Maqedoninë e Veriut dhe Shqipërinë, por Bullgaria e bllokoi atë vendim bazuar në akuzat se gjuha maqedonase është thjesht bullgare me një emër tjetër dhe se Shkupi nuk respekton lidhjet kulturore dhe historike me bullgarët. Kina dhe Rusia kanë kohë që po zgjerojnë ndikimin e tyre në Ballkan Perëndimor, duke përdorur strategji të ndryshme, me synimin e njëjtë për t’iu kundërvënë Perëndimit.