Ndërkombëtarët “zbarkojnë” sërish në Kosovë e Serbi, Albin Kurti pranon planin franko-gjerman, Vuçiç thotë se Perëndimi mund të ëndërrojë për njohje reciproke, ja prapaskenat

Tensionet mes Kosovës dhe Serbisë nuk po shuhen, pasi nga të dyja palët ka sërish mosmarrëveshje. Edhe pse kryeministri Albin Kurti ka pranuar planin franko-gjerman për dialogun me Serbinë, presidenti Vuçiç nga ana tjetër ka dhënë një mesazh të fortë ditën e djeshme se Kosova do të njihet si shtet nga Beogradi vetëm në ëndërr. Pavarësisht gjithë kësaj situate, presioni ndërkombëtar është shumë i fortë. Kjo bëri që Kurti të reagojë dje pas takimit me Përfaqësuesin Special të BE-së për dialogun, Miroslav Lajçak dhe bën të ditur se ai ka pranuar propozimin e BE për gjetjen e konsensusit me Serbinë. Sipas Kurtit, ky plan është një bazë e mirë për të gjetur emëruesin e përbashkët me Beogradin. Më tej ai e ka bërë të qartë se ka shumë rezerva mbi planin në fjalë, por ka premtuar se do i adresohet me një sërë pyetjesh Brukselit për tu qartësuar totalisht.

Mesazhi i fortë i Vuçiç

Ndërkombëtarët gjithashtu kanë “zbarkuar” edhe në Serbi. Pas Kurtit edhe Vuçiç tha se ka pasur një “bisedë të hapur dhe miqësore” me të dërguarin e posaçëm të Bashkimit Evropian për dialogun Kosovë-Serbi, Miroslav Lajçak. "Një bisedë e hapur dhe miqësore me Miroslav  Lajcak. Kur them e hapur, me të vërtetë e mendoj këtë", tha ai. Para takimit, Vuçiç postoi një video-mesazh në Instagram, në të cilin tha se do të “vazhdojë të mbrojë Serbinë” dhe se Perëndimi “mund të ëndërrojë për njohjen reciproke” të Beogradit ndaj Prishtinës.

10 pikat e planit franko-gjerman për Kosovën dhe Serbinë

Neni 1

Palët do të zhvillojnë reciprokisht marrëdhënie normale, të mira fqinjësore mbi bazën e të drejtave të barabarta. Të dyja palët do t’i njohin reciprokisht dokumentet përkatëse dhe simbolet kombëtare, duke përfshirë pasaportat, diplomat, targat e automjeteve dhe vulat doganore.

Neni 2

Të dyja palët do të udhëhiqen nga qëllimi dhe parimet e përcaktuara në Kartën e Kombeve të Bashkuara, veçanërisht ato për të drejtat sovrane të shteteve, respektimin e pavarësisë, autonomisë dhe integritetit territorial të tyre, të drejtën për vetëvendosje dhe mbrojtjen e të drejtave të njeriut dhe mosdiskriminimin.

Neni 3

Në përputhje me Kartën e Kombeve të Bashkuara, palët do t’i zgjidhin të gjitha mosmarrëveshjet ndërmjet tyre vetëm me mjete paqësore dhe do të përmbahen nga kërcënimi ose përdorimi i forcës.

Neni 4

Palët nisen nga supozimi se asnjëra prej tyre nuk mund ta përfaqësojë palën tjetër në sferën ndërkombëtare ose të veprojë në emër të saj. Serbia nuk do ta kundërshtojë anëtarësimin e Kosovës në asnjë organizatë ndërkombëtare.

Neni 5

Të dyja palët do t’i mbështesin aspiratat e tyre për t’u bërë anëtarë të Bashkimit Europian.

Neni 6

Ndërsa kjo marrëveshje bazë përfaqëson një hap të rëndësishëm në normalizim, të dyja palët do ta vazhdojnë procesin e dialogut të udhëhequr nga BE-ja me një vrull të ri, duke çuar në një marrëveshje ligjërisht të detyrueshme dhe gjithëpërfshirëse për normalizimin e marrëdhënieve. Palët bien dakord që në të ardhmen do ta thellojnë bashkëpunimin në të gjitha fushat.

Neni 7

Të dyja palët avokojnë për arritjen e marrëveshjeve konkrete, në përputhje me instrumentet përkatëse të Këshillit të Evropës dhe përdorimin e përvojave ekzistuese Europiane, në mënyrë që të sigurohet një nivel i duhur i vetëqeverisjes për komunitetin serb në Kosovë dhe mundësia e ofrimit të shërbimeve në Kosovë në disa fusha specifike, duke përfshirë mundësinë e ndihmës financiare nga Serbia dhe kanalet e drejtpërdrejta të komunikimit ndërmjet komunitetit serb dhe Qeverisë së Kosovës.

Neni 8

Palët do të shkëmbejnë misione të përhershme. Ato do të vendosen në selitë e qeverisë përkatëse. Çështjet praktike që lidhen me vendosjen e misioneve do të trajtohen veçmas.

Neni 9

Nga të dyja palët u vu në dukje përkushtimi i BE-së dhe kontribuesve të tjerë për të krijuar një paketë të veçantë të ndihmës financiare për projektet e përbashkëta të palëve për zhvillimin ekonomik, lidhjen, tranzicionin e gjelbër dhe fusha të tjera kyçe.

Neni 10

Palët do të krijojnë një komision të përbashkët, të kryesuar nga BE-ja, i cili do të monitorojë zbatimin e kësaj marrëveshjeje. Të dyja palët konfirmojnë detyrimet e tyre për t’i zbatuar të gjitha marrëveshjet e mëparshme.