Nga rrahja e shtetasit amerikan, tek prania e grupeve ekstremiste, zbardhen prapaskenat dhe incidentet e dhunshme nga protestat në Serbi

 Protesta e së shtunës, që është konsideruar si më e madhja deri tani në Serbi, kundër udhëheqjes së presidentit Aleksandër Vuçiç, nuk ka kaluar pa incidente. Një 22-vjeçar, është shoqëruar në Polici, pasi dyshohet se mbrëmë, në sheshin kryesor Nikolla Pashiq, goditi një shtetas amerikan, i cili siç dyshohet kishte provokuar më parë qytetarët që ndodheshin aty. Pas konsultimit me prokurorinë kompetente, kundër tij dhe shtetasit amerikan, me banim të paregjistruar në Serbi, janë ngritur kallëzime për kundërvajtje për prishje të rendit dhe qetësisë publike. Gjithashtu, ndaj shtetasit amerikan është ngritur kallëzim kundërvajtës për shkelje të ligjit për të huajt. Me vendim të Gjykatës për Kundërvajtje në Beograd, shtetasi amerikan është dënuar me 30 ditë burg, ndërsa 22-vjeçari është dënuar me 15 ditë burg. Siç raportoi “Blic” nga vendi i ngjarjes, në protestën “Serbia kundër dhunës” në fillim nuk është vërejtur një prani e madhe e lëvizjeve të djathta apo nacionaliste. Ata thanë se nuk do të mbanin fjalime, por se do t'i bashkoheshin turmës. Pas përfundimit të fjalimit rreth orës 19:20, megjithatë, para parlamentit janë parë anëtarë të të ashtuquajturave "Patrullat Popullore", të udhëhequr nga Damjan Knezheviç.  Pak para orës 20:00, ndodhi një incident. Grupi i “Patrullave të Popullit” sulmuan një shtetas të huaj, që fliste anglisht. Siç raporton N1, i huaji ka qenë i dehur dhe ka provokuar anëtarët e “Patrullës së Popullit” të cilët e kanë goditur disa herë me shuplakë para se ta merrte policia. Sakaq, një protestë e re është planifikuar për javën e ardhshme, e gjashta që pasi ndodhën dy masakrat që tronditën Serbinë.