Osmani: Serbia shkaktoi krizën për të shmangur diskutimin e marrëveshjes përfundimtare me Kosovën

Presidentja e Kosovës, Vjosa Osmani, ka akuzuar ditën e djeshme Serbinë se ka “shkaktuar krizë” në javët e kaluara në mënyrë që të dy palët të mos diskutojnë për “marrëveshjen përfundimtare”. Në Sofje, ku u takua me presidentin e Bullgarisë, Rumen Radev, Osmani vlerësoi se është koha që BE-ja, si ndërmjetëse e dialogut Beograd-Prishtinë, të kuptojë se Serbia ka përdorur taktika penguese. Ajo zbuloi se Serbia po përpiqet të bllokojë perspektivën e Kosovës në rajon dhe në nivel ndërkombëtar. “Sigurisht që është në interesin tonë që ky dialog të përmbyllet me një marrëveshje ligjërisht e detyrueshme dhe duhet të kuptojmë se pala tjetër nuk është e interesuar që ky proces të përfundojë me sukses”, tha presidentja e Kosovës. Ajo vlerësoi se Serbia “filloi të prodhonte kriza” kur, sipas saj, BE-ja, me mbështetjen e SHBA-së, Francës dhe Gjermanisë, bëri propozimin për zgjidhjen e mosmarrëveshjeve “mes dy vendeve”. Në njoftim thuhet gjithashtu se Bullgaria ka shprehur gatishmërinë për të mbështetur Kosovën në përballjen me krizën energjetike. Kosova dhe Serbia, dy vende ballkanike që kryen një luftë të përgjakshme në vitet 1990 dhe kanë jetuar në një bashkëjetesë të vështirë që atëherë, janë sërish në mosmarrëveshje, këtë herë për lëvizjet e Kosovës për të detyruar serbët etnikë që jetojnë në rajonet e saj veriore të marrin targa, lëshuar nga autoritetet kosovare. Gazeta “Sot” pas luftës në Ukrainë ka raportuar shumë herë se Putin po kërkon të përdorë Ballkanin për të shkaktuar tension dhe destabilizim. Për më shumë se dy dekada, Kosova ka qenë një çështje që i ka përplasur Perëndimin dhe Rusinë. Gjatë viteve të 90-ta, Rusia hapur ka qenë në mbështetje të Serbisë edhe përkundër faktit që shteti serb ka nisur dhe kryer disa luftëra në Ballkan, përfshirë edhe luftën e fundit në Kosovë.