Plas keq debati në Shkup, presidenti pranon propozimin francez, opozita maqedonase i thotë “jo” BE: Nuk na duhet Evropa nëse asimilohemi

Ka plasur debati i zjarrtë në Shkup, lidhur me propozimin francez për zgjidhjen e kontestit me Bullgarinë. Presidenti i Maqedonisë së Veriut, Stevo Pendarovski ka deklaruar dje se propozimi i ri francez për zgjidhjen e kontestit me Bullgarinë është i pranueshëm pasi sipas tij, bëhet fjalë për një “kompromis kalimtar”, për të nisur bisedimet e anëtarësimit me Bashkimin Evropian. Pas mbledhjes së Këshillit të Sigurisë Kombëtare, në të cilin marrin pjesë institucionet kryesore të shtetit, presidenti Pendarovski tha sa qeveria duhet të miratojë edhe një konkluzion apo aneks në propozimin e modifikuar se do të refuzojë bisedimet në rast se gjatë këtij procesi pala bullgare insiston që të negociohet edhe për gjuhën dhe identitetin maqedonas. “Ne nuk duhet të presim që dikush të na bllokojë, por ne duhet menjëherë të tërhiqemi nga bisedimet. Këtë e them sepse e dimë se me kë kemi punë”, ka deklaruar presidenti Pendarovski. Por e kundërta ka ndodhur me partinë më të madhe opozitare në Maqedoninë e Veriut,e cila ka hedhur poshtë propozimin francez , që do të zgjidhte përfundimisht mosmarrëveshjet me Bullgarinë fqinje dhe kjo e fundit të hiqte veton për t’i hapur rrugën integrimit të Shkupit dhe rrjedhimisht edhe Shqipërisë. Përmes një tubimi përpara godinës qeveritare, lideri i partisë konservatore VMRO-DPMNE, Hristjan Mickoski e ka quajtur propozimin e bërë nga Franca si të dëmshëm për identitetin maqedonas. “Populli po zgjohet dhe të gjithë ata që duan t'i japin fund Maqedonisë duke nënshkruar marrëveshje brenda një apo dy ditëve do të mbahen mend nga qytetarët maqedonas. Nuk na duhet Evropa nëse duhet të asimilohemi. Nuk dua të jem në Evropë sepse kam të drejtë të jem maqedonas, të kem identitetin dhe kulturën time. Propozimi francez është i dëmshëm për identitetin tone”, tha ai.