Presidenti Vuçiç takon Lajçak në Beograd: Të zbatohet marrëveshja për Asociacionin

Presidenti i Serbisë, Aleksandër Vuçiç është takuar ditën e djeshme me të dërguarin e posaçëm të Bashkimit Evropian për dialogun Kosovë-Serbi, Miroslav Lajçak. Në fokus të bisedës ishte normalizimi i raporteve si dhe çështja e kthimit të serbëve në institucionet e Kosovës. Në rrjetin social Instagram Vuçiç theksoi se me Lajçakun ka diskutuar për dialogun ndërmjet Prishtinës dhe Beogradit, si dhe problemet me të cilat po përballen serbët e Kosovës “për shkak të lëvizjeve të njëanshme dhe jolegjitime të Prishtinës”. “E theksova domosdoshmërinë e zbatimit të marrëveshjes për Asociacionin e komunave me shumicë serbe dhe respektimin e të drejtave dhe vullnetit të popullit tonë. Serbia është e vendosur të vazhdojë dialogun konstruktiv, me qëllim të ruajtjes së paqes dhe stabilitetit dhe kushteve më të mira për jetën e të gjithëve qytetarëve”, shkroi Vuçiç. Ndërsa Lajçak tha se takimi me presidentin e Serbisë, është si takim pasues pas raundit të fundit të dialogut midis Kosovës dhe Serbisë, që ndërmjetësohet nga blloku evropian.”Ne po ashtu biseduam për çështjet aktuale, përfshirë kthimin e serbëve të Kosovës në institucionet e Kosovës, udhërrëfyesin e energjisë dhe personat e zhdukur”, shkroi Lajçak në Twitter. Lajçak vizitoi Beogradin, pasi Vuçiç e quajti Kurtin “llum terrorist” dhe paralajmëroi se nuk do të marrë pjesë në samitin e mbajtur në tiranë, në shenjë zemërimi për emërimin e Nenad Rashiç në postin e ministrit për Komunitetet dhe Kthim. Kosova dhe Serbia kanë arritur marrëveshje për Asociacionin më 2013 dhe më pas më 2015 mbi parimet për themelimin e tij. Po më 2015, Gjykata Kushtetuese e Kosovës ka gjetur se marrëveshja nuk është në harmoni të plotë me Kushtetutën.