Radojiçiç “kurban” i Vuçiç, Serbia përfshin Dodikun në sulmin terrorist në Veri: Ish-nënkryetari i Listës Serbe mori armë në Bosnjë dhe i fshehu në pyjet e Kosovës

Serbia me në krye presidentin Aleksandër Vuçiç po përpiqet që përgjegjësinë për sulmin në veri të Kosovës t’ia kalojë Bosnjë-Hercegovinës. Në urdhrin për zhvillimin e hetimeve kundër Milan Radoiçiçit, thuhet se lideri i këtij formacioni paraushtarak ka marrë armë në Tuzla. Prokuroria e Lartë Publike në Beograd tha se ka marrë në pyetje Milan Radoiçiçin, i cili mori përgjegjësinë për organizimin e sulmit në Banjskë, fshat në pjesën veriore të Kosovës. Në njoftim thuhet se ai u mor në pyetje nën dyshimet se me disa persona të panjohur, kanë kryer vepra penale që lidhen me “prodhim, mbajtje dhe trafikim pa leje të armëve të zjarrit dhe lëndëve plasëse” si dhe me “vepra të rënda kundër sigurisë së përgjithshme”. “Milan Radoiçiç akuzohet se nga janari i vitit 2023 deri më 24 shtator ka blerë armë, municion dhe mjete shpërthyese me fuqi të madhe shkatërruese nga Tuzla, Federata e Bosnjës dhe Hercegovinës, të cilat më së shpeshti i janë dorëzuar në territorin e qytetit të Beogradit në relacionin Bubanj Potok- Vërçin, dhe të cilat më pas i ka transportuar dhe ruajtur në lokacione të pacaktuara në territorin e Kosovës, ku i ka fshehur në objekte dhe pyje të braktisura, kështu që si udhëheqës i një grupi me disa persona të panjohur, me veprim të përbashkët dhe një veprim përgjithësisht të rrezikshëm më 24 shtator ka shkaktuar rrezik për jetën e njerëzve në qytetin e Banjskës në territorin e Kosovës”, thuhet në njoftimin e Prokurorisë së Lartë Publike. Sipas saj, i dyshuari e ka mohuar kryerjen e veprave të përmendura penale. Ministria e Brendshme e Serbisë njoftoi më herët se ka kontrolluar banesën dhe ambientet e tjera të Radoiçiçit dhe se atij i është shqiptuar masa e ndalimit për 48 orë, nën dyshimin  për “trafikim armësh” MPB-ja serbe tha se Radoiçiç u dërgua në Prokurorinë e Lartë Publike në Beograd me kallëzim penal, por nuk dha më shumë detaje. Më 29 shtator, Radoiçiç, përmes një letre të lexuar nga avokati i tij, Goran Petronijeviç, mori përgjegjësinë për organizimin e sulmit në Banjskë. Në këtë fshat të komunës së Zveçanit, grupe të armatosura serbësh sulmuan policinë e Kosovës më 24 shtator, duke vrarë rreshterin Afrim Bunjaku. Në shkëmbimin e zjarrit që pasoi, u vranë edhe tre sulmues.

Reagon Bosnja

Pretendimet e Serbisë janë hedhur poshtë dje nga Bosnja. Ministri i Brendshëm i Federatës së Bosnje dhe Hercegovinës, Ramo Isak, tha për Radion Evropa e Lirë se "nuk ka informacion për ndonjë armë në zonën e Tuzllës", që lidhet me rastin e Radoiçiçit. E kontaktuar nga REL-i, edhe Zyra e Prokurorit të Kantonit të Tuzllës tha se "nuk ka, as nuk mund të ketë ndonjë informacion" për armët në këtë qytet të Bosnjës. Administrata Federale e Policisë tha për REL-in se do të "ndërmarrë aktivitete në lidhje me verifikimin e pretendimeve se Millan Radoiçiq ka blerë armë, municione dhe mjete shpërthyese me fuqi të madhe shkatërruese nga Tuzlla nga janari 2023 deri më 24 shtator. Në mëngjes do të kërkojmë nga autoritetet e Republikës së Serbisë që të na japin informacionin në dispozicion

Prapaskenat e sulmit

Me këtë zhvillim të fortë tregohet se Vuçiç po bë “kurban” Radojçiçin. Dhe këtë e tregojnë provat e qarta. Ishte vetë Vuçiçi që e lajmëroi arrestimin për herë të fundit në intervistën për CNN. Edhe Radojçiçi, në deklaratën që ka bërë përmes avokatit ka thënë se ishte i gatshëm të jepte llogari para organeve të drejtësisë serbe për sulmin në veri të Kosovës. Po ashtu duhet pasur parasysh se Radojçiç u identifikua menjëherë nga policia e Kosovës si personi që drejtonte skuadrën e armatosur në Banjskë. Pavarësisht kësaj, ai qëndroi për 10 ditë i lirë në Serbi pa u thirrur nga prokuroria. Gjatë kësaj kohe, vendndodhja e tij ishte e ditur dhe presidenti i Serbisë deklaroi publikisht në 27 Shtator, (tre ditë pas sulmit) se Radojçiç ndodhej në Serbi, ndërkohë që ndaj tij nuk u mor asnjë masë. Gjithashtu vetë Radojçiç në deklaratën që bëri përmes avokatit, tregoi se ishte në një linjë me Vuçiçin. Ai e ndihmoi shefin e tij, kur mori mbi vete përgjegjësinë për sulmin, duke mbështetur alibinë e Vuçiçit se shteti serb nuk dinte asgjë për atë që po përgatitej në Banjskë.