Skemat e manovrave të mëdha të Rusisë me gazin, ja si Ballkani mund ta shpëtojë Vladimir Putinin nga kolapsi

Lufta e gazit në Ballkan është e heshtur, por kjo luftë e influencës mes Rusisë dhe Perëndimit ndikon në të ardhmen e këtij rajoni të brishtë të Evropës Juglindore, sipas ekspertëve. Nëse Perëndimi ka një avantazh të qartë përsa i përket investimeve në ekonomitë lokale në rajon, Rusia ka një mundësi, kartën energjetike. Në Serbi, në Bosnjë-Hercegovinë, në Bullgari dhe në Maqedoni, Rusia po përpiqet të transformojë varësinë e gazit në varësi politike me qëllim për të penguar integrimin në Perëndim, por edhe në një mënyrë për të shpëtuar Rusinë nga kolapsi pas sanksioneve të forta nga SHBA-BE. Serbia dhe Bosnja e kanë konfirmuar hapur së fundmi vazhdimin me furnizim me gaz nga Moska duke dalë kundër politikave të Perëndimit. Në një telefonatë mes presidentit serb, Aleksandër Vuçiç dhe atij rus, Vladimir Putin, pak ditë më parë është rënë në ujdi për një marrëveshje furnizimi me gaz për tre vjet. Serbia dhe Rusia duan të thellojnë partneritetin. Nga ana tjetër në takimin e lideri serb nga Bosnjë-Hercegovina Milorad Dodik me Vladimir Putinin së fundmi u paralajmërua forcimi i bashkëpunimit me Vladimir Putinin, veçanërisht për gazin rus. Sipas agjencisë serbe të lajmeve Tanjug, Dodik tha se me palën ruse janë diskutuar çështje të rëndësishme të infrastrukturës dhe se vendimi për ndërtimin e një gazsjellësi dhe dy termocentrale në Republika Srpska është konfirmuar. Dodik falënderoi gjithashtu Rusinë për mbajtjen e çmimeve të gazit të ulëta dhe tha se "nuk sheh alternativë" ndaj naftës dhe gazit rus. Gjithashtu edhe në Bullgari po zhvillohet një luftë e fortë për gazin, ku zëvendësministri i Energjisë, Plamen Danailov, tha se partia e tij ka insistuar në “një qasje më të balancuar” dhe shtyrjen e ndonjë refuzimi kategorik të furnizimeve me gazin rus.