Të dërguarit e SHBA dhe BE në Kosovë, “kokë më kokë” për shumë se dy orë me Kurtin, Lajçak: Takim i gjatë e i hapur, por jo i lehtë

Shtetet e Bashkuara të Amerikës dhe BE kanë nisur një përpjekje të re diplomatike për nxitjen e dialogut mes Kosovës e Serbisë. Por 5 të dërguarit specialë janë përballur me një diskutim jo të lehtë me Albin Kurtin në Prishtinë. Ndërmjetësi i Bashkimit Evropian për dialogun Kosovë-Serbi, Miroslav Lajçak pas takimit me Kurtin në një deklaratë për media tha se takimi ishte i gjatë dhe jo i lehtë. “Ne jemi këtu me një delegacion të fuqishëm që është sinjal se ne jemi të zotuar për një normalizim të raporteve Kosovë-Serbi. Takimi ishte më shumë se dy orë, i gjatë, i hapur por jo i lehtë”, tha Lajçak para mediave. Ai theksoi se Bashkimi Evropian dhe SHBA-ja janë të përkushtuara për arritjen e normalizimit të marrëdhënieve ndërmjet Kosovës dhe Serbisë dhe përpjekjen diplomatike e cilësoi si dëshmi. Synimi i këtyre takimeve është përgatitja e terrenit për vazhdimin e dialogut të nivelit të Lartë mes Kosovës dhe Serbisë në Bruksel, në kuadër të përpjekjes për marrëveshjen përfundimtare mes dy vendeve. Liderët e Kosovës thotë se ky proces duhet të përfundojë me njohje të ndërsjellë, ndërsa në Serbi insistojnë në zgjidhje kompromisi, por pa specifikuar shumë se çka nënkuptojnë me të. Marrëveshja e atëhershme mes dy shteteve gjermane po shërben tani si model për një marrëveshje të mundshme mes Serbisë dhe Kosovës. Propozimi zyrtar i BE-së bazohet në planin franko-gjerman, i cili quhet kështu meqë variantin e tij të parë e prezantuan në shtator në një udhëtim të përbashkët në Prishtinë dhe Beograd, këshilltari i kancelarit gjerman, Olaf Scholz, Jens Plötner dhe këshilltari i presidentit francez, Emmanuel Macron, Emmanuel Bonne. Deri tani plani evropian po mbahet ende konfidencial.