Tensionet në kufi, diplomati i njohur del me deklaratën 'bombë': Skenari në Veri të Kosovës i orkestruar prej vitesh

Njohësi i marrëdhënieve ndërkombëtare, Shqipërim Pula, për situatën në Veri të Kosovës deklaroi se ajo ku duhet vënë theksi dhe shpalosur si e vërtetë, është se Kosova edhe në periudha të mëparshme ka ndërmarrë veprime që kanë pasur vërejtje nga ana e shtetit amerikan.

Në një lidhje me MCN Live, ai tha se këto veprime aktuale janë tërësisht ligjore, për shtrirjen e sovranitetit të shtetit të Kosovës në gjithë territorin e saj.

Pula shtoi se ngjarjet që po ndodhin në Veri të Kosovës janë veprime të orkestruara tërësisht nga Beogradi zyrtar dhe nuk ka asnjë veprim të qëllimshëm nga qeveria e Kosovës.

Ai tha se Kosova nuk ka shpallur gjendje të jashtëzakonshme për të ndaluar udhëtimet jashtë shtetit.

Situata nuk është e mirë por nuk është vlerësuar nga Këshilli i Sigurisë së Kosovës që do duhej t’i adresonte të gjitha situatat atje për të shpallur një gjendje të jashtëzakonshme për të shmangur udhëtimet ndaj vendit qoftë të Kryeministrit edhe të Presidentes, të cilët kanë shkuar sot në Bratisllavë për të marrë pjesë në Forumin “GLOBSEC2023”.

Me rëndësi është që situata të jetë e monitoruar nga forcat e sigurisë, qoftë vendore dhe ato ndërkombëtare. Në tre ditët e fundit vihet re se nuk janë qytetarët e zakonshëm ata që kanë bërë dhunë dhe vandalizëm, por janë grupet parashtetërore serbe që kanë organizuar një situatë të tillë, duke qenë të ndihmuar nga brenda Serbisë, nga ajo pjesë humanitare ruso-serbe dhe nga një pjesë që janë futur edhe brenda territorit të Kosovës.

Po dokumentohet gjithë situata për të identifikuar se kush janë personat që kanë bërë vandalizëm.

Vërtetë kemi probleme serioze në Kosovë, por nuk duhet lënë pa theksuar se ne prej shumë vitesh kemi pasur një fatkeqësi kombëtare si shumicë në Kosovë, që kemi pasur individë në politikë aktivë, me mangësi thelbësore të identiteti kombëtar, që kanë folur serbisht në gjuhën shqipe, duke parë interesat ekonomike.

Ky skenar i ditëve të fundit nuk është i rastësishëm, por orkestrim prej shumë vitesh, fatkeqësia qëndron te politikanët që kanë parë interesin e tyre personal.

Ka pasur një mungesë vëmendje dhe dashurie për atë pjesë të shqiptarëve në Veri të Kosovës.