Vazhdon “cirku” në Bosnjë-Hercegovinë, Dodik përplaset ashpër me ministrin e Punëve të Jashtme, ja pse rekomandimi i KE ka përçarë qeverinë

Ministri i Punëve të Jashtme të BiH, Elmedin Konakoviç dhe udhëheqësi i Republika Srpska, Milorad Dodik, po përplasen gjithnjë e më shumë publikisht, duke shkëmbyer fyerje dhe fjalë të ashpra, pavarësisht faktit se BiH përballet me detyrën e miratimit të ligjeve reformuese për të hapur negociatat me BE-në në mars. Kështu Konakoviç e quajti të martën "teze" liderin serb të Bosnjës Milorad Dodik, duke i thënë se nuk ka asgjë tjetër për t'u ofruar votuesve të tij, përveç argumenteve dhe provokimeve të vazhdueshme. Konakoviç dhe Dodik janë dy liderët e partive Narod i Pravda (NiP) dhe Aleancës së Social Demokratëve të Pavarur (SNSD), të cilat janë partnerë në qeveri në nivel shtetëror, por kjo nuk i pengoi ata t’i drejtoheshin njëri-tjetrit me fjalë të ashpra dhe akuza për shkak të pikëpamjeve të ndryshme të situatës aktuale politike në vend. Tashmë ka arritur situata deri te zënkat nëpër rrjetet sociale. Në një postim në “X”, Dodik e cilësoi Konakoviqin si një politikan mediokër dhe të papjekur, i cili nuk e di se çfarë po bën. “Janë të zgjuar ata që thonë: kur Konakoviç luan për BiH, atëherë BiH humbet më së shumti”, ka shkruar Dodik. Ai e bëri këtë pasi kreu i diplomacisë së Bosnje-Hercegovinës deklaroi se Dodik tani nuk ka zgjidhje tjetër veçse të deklarojë qartë nëse është pro vazhdimit të integrimit evropian dhe nëse e konfirmon këtë, atëherë duhet të pajtohet edhe me reformat që kjo përfshin, dhe se duke vepruar kështu, ai "ra në grackën" që donte të fuste të tjerët. Konfliktet në koalicionin qeverisës u përshkallëzuan pasi Komisioni Evropian rekomandoi me kusht hapjen e negociatave të anëtarësimit me Bosnjë-Hercegovinën.