Video/ Çfarë po ndodh? KFOR dhe serbët lokalë matin “forcat” në veri të Kosovës

Ushtarët amerikanë të KFOR-it dhe qytetarë serbë kanë garuar të martën në “tërheqje me litar” në kuadër të “Lojërave të Punëtorëve”, manifestim tradicional i serbëve të Leposaviçit, shkruan “Kossev”.

Lojërat kishin nisur një ditë më parë, ndërsa të martën serbëve iu bashkuan edhe ushtarët që po kujdesen për objektin e Komunës, që kur kanë nisur protestat në fund të majit.

Këto lojëra tradicionalisht luhen në Leposaviç për më shumë se 45 vjet, sipas mediave lokale.

Lojërat u zhvilluan në mes të protestave. Që nga 26 maji, serbët po qëndrojnë para objekteve të komunave në katër komunat në veri të vendit, duke kundërshtuar hyrjen e kryetarëve të rinj në objektet komunale. Ka pasur edhe protesta të dhunshme. Si pasojë, 30 ushtarë të KFOR-it e policë të Kosovës kanë pësuar lëndime.