Uruguaji mposht Portugalinë dhe kalon në çerekfinale, Ronaldo lë Botërorin mes lotësh

Uruguaji i bashkohet Francës në çerekfinalen e Kupës së Botës, pasi mundi mbrëmë Portugalinë e Kristiano Ronaldos me rezultatin 2-1. Ishte një ndeshje e madhe për të dyja skuadrat, por Portugalia u përball me një skuadër mjaft cilësore dhe e kishte të pamundur të përballonte sulmin e fuqishëm të Kavanit e Suarezit, dy prej më të mirëve në botë dhe lojtarë që rezultuan vendimtarë, sidomos Kavani me dy golat e tij. Në fakt, Uruguaji tregoi se është një prej ekipeve më të forta në këtë Botëror. Skuadra që drejtohet nga trajneri Tabarez bëri një lojë shumë të mirë në të dy pjesët, duke u mbrojtur me kujdes dhe duke kundërsulmuar rrezikshëm dhe ia doli të kalonte dy herë në epërsi. Heroi i takimit për amerikanojugorët ishte Edinson Kavani, që shënoi shumë shpejt për skuadrën e tij, që në minutën e shtatë të takimit, duke i dhënë një epërsi të padiskutueshme skuadrës së tij. goli e çliroi Uruguajin nga presioni, ndërsa shtrëngoi Portugalinë të kalonte në sulm në kërkim të golit të barazimit. Në tërësi dominimi i Uruguajit në mesfushë ishte evident gjatë fraksionit të parë të lojës, dhe shoqërua kjo me mbrojtjen e kujdesshme e bënte Uruguajin fitues psikologjik të ndeshjes. Pjesa e parë mbyllet me fitoren e amerikano-jugorëve 1-0. Në pjesën e dytë Portugalia do të nxirrte nga hiçi një gol që do ta barazonte ndeshjen. Një goditje këndi solli dhe golin e barazimit. Pasi topi i krosuar në zonë shfrytëzohet nga Pepe, i cili, i pambuluar nga mbrojtësit me kokë e dërgon në rrjetë. Barazimi bëri që Uruguaji të rikthehej dhe një herë në sulm dhe saktësia në veprime, por edhe klasi i Edinson Kavanit bënë që Uruguaji të gjente golin e dytë. Kavani realizoi një supergoditje me të djathtën, në një pozicion të prirët dhe nuk i dha asnjë shans portierit Rui Patrisio. 2-1 dhe dukej se Uruguaji kishte më shumë shanse për të fituar. Por Portugalia nuk u tremb, ajo u hodh në sulm dhe nëse Ronaldo u mbulua rreptë, Silva dhe Kuarezma u treguan të rrezikshëm në veprimet e tyre dhe pati mjaft raste për shënim. Gjithsesi, mbrojtja e hekurt uruguaiane ishte e pakalueshme dhe portieri Muslera i spastroi mirë hapësirat kur e thirri detyra. Kuarezma ishte rrezik konstant në krahun e djathtë dhe u përpoq në të gjitha mënyrat të ndikonte në rezultatin e ndeshjes, por Diego Godin e izoloi atë mjaft mirë dhe madje mbrojtësi i Atletikos ishte nga më të mirët në fushë, duke i fituar të gjitha duelet. Si përfundim, fitoi Uruguaji 2-1 dhe kalon në çerekfinale ku do të përballet me Francën, kurse Portugalia eliminohet dhe Ronaldo i bashkohet Mesit për t’u kthyer në shtëpi. 

Adriatik BALLA