Fëmijët ‘mbushin’ pediatrinë e Elbasanit, 90 raste në ditë, mbi 10% me Covid-19

Kopshtet dhe shkollat prej më shumë se 10 ditësh kanë hapur dyert për fëmijët dhe nxënësit, por bashkë më fillimin e procesit mësimor janë rikthyer virozat. Qëndrimi në ambiente të përbashkëta, ndikon në përhapjen e shpejtë tek njëri-tjetri. Këtë fakt e pohon shefja e pediatrisë në Elbasan, e cila thekson se në 24 orë janë afro 90 fëmijë që marrin trajtim në spital.

“Paraqitja varjon nga 80-90 në ditë, por tashmë ka ndryshuar diagnoza. Tani na vijnë fëmije me rinite, faringite, me rrufe me kollë me autite që janë të sezonit të kopshteve. Fëmijë që vjen me kollë dhe me rrufë thotë që në kopshte apo në shkollë ka fëmije me te tilla simptoma”,- tha Irena Palloshi, shefe e pediatrisë Elbasan

Përpos virozave stinore, një tjetër diagnozë e hasur shpesh nga kontrollet e fëmijëve që shkojnë në spital është edhe infektimi me Covid-19. Një pjesë e tyre janë shtruar në spital, pasi paraqesin simptoma më të rënda.

“Në pavion infektiv kemi edhe fëmije me covid,  aktualisht kemi 12 fëmijë të shtruar. Gjendja e tyre paraqitet e mire nuk kemi asnjë rast të rënde të transferuar në Tiranë. Janë fëmijë me temperaturë dhe te vjella të cilët kërkojnë një mjekim spitalorë, 2 deri ne 3 dite dhe me pas gjendja e tyre përmirësohet”,- tha Irena Palloshi, shefe e pediatrisë Elbasan.

Në këtë situatë, mjekja pediatre ndan këshilla për prindërit se si duhet të veprojnë kur fëmijët e tyre shfaqin simptoma gripale.  

“Në momentin që fëmija është me temperaturë dhe me shënja viroze prindi do bëj mirë të mos paraqitet ne kopsht apo shkollë që të mos jenë burim infeksioni. Por njëkohësisht prindërit duhet te bëjnë kujdes edhe nëse kanë një fëmijë në kopsht apo shkollë dhe kanë një bebushe ne shtëpi, të kenë kujdes që ky infeksion të mos i kalojë fëmijëve te tjerë”,- tha Irena Palloshi, shefe e pediatrisë Elbasan.

Po ashtu, sipas mjekeve një kujdes të veçantë duhet t’i kushtohet higjienës personale të fëmijëve dhe higjienës së produkteve që ata konsumojnë çdo ditë.