Zbulohet bakteri i ri që po sfidon ligjet e biologjisë, çfarë i ka befasuar shkencëtarët

Një bakter në përmasa të tilla saqë shihet me sy të lirë, sfidon ligjet e biologjisë.

Bakteri është një centimetër i gjatë dhe u zbulua në kënetat e mangrove në Karaibe, në arkipelagun e Guadelupes. Thiomargarita magnifica, jo vetëm që është 5000 herë më i madh se shumica e baktereve, por ka edhe gjithashtu një strukturë të brendshme komplekse, e cila mund të anashkalojë kufizimet e zakonshme fizike dhe energjike që hasin të afërmit e saj.

Zbulimi, i botuar në revistën “Science”, është bërë në Laboratorin Kombëtar Amerikan Lawrence Berkeley dhe sugjeron se ky mund të jetë vetëm i pari i një grupi bakteresh gjigante që ende nuk janë zbuluar.

“Me siguri mund të presim zbulimin e baktereve të tjera, madje edhe më të mëdha: është një lloj që zakonisht jeton në mjedise shumë jomikpritëse dhe për këtë arsye janë ende pak të studiuara”, thotë për ANSA Fiorentina Ascenzioni, profesoreshë e mikrobiologjisë në Universitetin La Sapienza. "Ndër të tjera, ato mund të na bëjnë të kuptojmë më mirë evolucionin e jetës në Tokë sepse ato mund të paraqesin karakteristika të ndërmjetme midis baktereve dhe organizmave më kompleksë".

Tradicionalisht bakteret janë të dukshme vetëm me anë të mikroskopëve të aftë për të zmadhuar objektin e vëzhguar nga 100 në 1000 herë, por në këtë rast ishte e mundur të shihej bakteri i ri pa pasur nevojë të përdoret asnjë mjet zmadhues.