Al Khelaifi prezanton Glatier: Synojmë të fitojmë Champions League

Sheiku i klubit francez prezantoi trajnerin e ri që zëvendëson Poçetinon, shpreson që PSG të fitojë trofeun e Ligës së Kampioneve

Paris San Zhermen e ka bërë tashmë ndryshimin në pankinë. Ditën e djeshme, sheiku financues i klubit, presidenti Naser Al Khelaifi prezantoi trajnerin e ri të kampionëve të Francës, Kristof Galtier, duke zëvendësuar kështu Mauricio Poçetinon me të cilin klubi u nda me një marrëveshje. Në konferencën për shtyp, Galtier u shoqërua nga presidenti Al Khelaifi dhe foli për marrëdhëniet e tij me drejtorin sportiv Okampos, vendimin e Mbape për të qëndruar dhe skemën që dëshiron të përdorë. Jam i prekur dhe krenar. Sapo mbërrita në “Parc des Princes”, pashë fjalinë “Këtu është Paris” dhe kuptova menjëherë pritshmëritë. Duhet t’i bëjmë njerëzit të lumtur dhe përderisa e kam pranuar këtë përgjegjësi, do të thotë se jam i aftë t’ia dal. Vetëm është shumë e vështirë, por nëse jemi të gjithë bashkë, atëherë mund të bëjmë shumë mirë. Prania e Lukas Okampos është padyshim një faktor i rëndësishëm që unë jam këtu. Me lojtarët nuk kam folur, por do t’u përshtatem shumë mirë. E kam shumë të qartë idenë se si duhet të luajmë, pasi dëshiroj të vendosemi shumë lart dhe të kontrollojmë topin. Natyrisht po shikojmë me pozitivitet aplikimin e mbrojtjes me tre, por ajo që ka rëndësi është që të gjithë të luajnë në rolin e tyre të preferuar dhe skuadra të mos e humbë ekuilibrin”, theksoi ai. Nuk kishte si të mungonte debati rreth Nejmarit dhe qëndrimin e Kilian Mbapesë. Cili trajner nuk do ta donte Nejmar në ekip? Ai është një futbollist i klasit botëror dhe unë kam një ide të qartë se si dua ta përdor. Shpresoj që të qëndrojë me ne. Si një trajner francez, jam shumë i lumtur që Kilian do të vijojë të luajë në kampionatin tonë dhe akoma më i lumtur që do ta stërvit unë te PSG-ja. E njoh shumë mirë dhe i di pritshmëritë e tij për ekipin. Është shumë i shpejtë dhe i fortë teknikisht, ndaj nëse këto cilësi vihen në shërbim të ekipit, atëherë do të jetë diçka fantastike”, shtoi ai. Më tej Galtier foli për ambicien e PSG-së për të fituar Champions, por ai iu shmang me stil francez. “Nuk mund të flasim për Champions që ditën e parë, pasi nuk kemi nisur ende përgatitjet. Ajo që unë kam në mendje është të ndërtojmë një filozofi të qartë loje, me një skuadër që sulmon vazhdimisht dhe asnjëherë nuk e humb ekuilibrin. Rrugës do të shohim se ku mund të arrijmë, por nuk dua të kemi limite”, vijoi Galtier. Në fund ai foli për portierin që do të zgjedhë në sezonin e ri (mes Donarumës dhe Navasit). “Do të takoj të dy portierët që në fillim, pasi në filozofinë time ka gjithmonë një numër 1 dhe një tjetër rezervë”, përfundoi Galtier.