Al Nasr ofertë serioze për Modriç, kroati drejt Arabisë

Njëri nga emrat e përmendur së fundmi për t’iu bashkuar Kristiano Ronaldos tek arabët e Al Nasr, është edhe Luka Modriç. Duke u bazuar në burimet e veta, “Okaz Sports” ka raportuar se Al-Nasr i ka bërë një ofertë zyrtare mesfushorit kroat. Sipas mediumit arab, bëhet fjalë për një kontratë për 2 vite e gjysmë, me vlerë prej më shumë se 40 milionë eurosh. Klubi nga Arabia Saudite thuhet se e synon transferimin e Modriçit gjatë këtij afati dimëror. Por, në rast se një marrëveshje nuk arrihet, klubi do të synojë në verë. Pas përfundimit të sezonit, ish-mesfushori i Totenhemit mund të largohet si futbollist i lirë nga “Santiago Bernabeu”. 37-vjeçari me “Los Blancos” ka kontratë të vlefshme deri më 30 qershor 2023. Pavarësisht moshës, ai po vazhdon të jetë njëri prej lojtarëve kryesorë tek Reali i Madridit e pëlqehet nga trajneri Ançeloti.