Ançeloti po “divorcohet” me Realin e Madridit, joshet nga oferta e kombëtares së Brazilit

Brazili dështoi në Botërorin e Katarit që në fazën e 1/8 e finales, ku u eliminua me penallti nga Kroacia. Ky eliminim shokoi tifozët brazilianë që mendonin se përfaqësuesja e tyre do të shkonte të paktën deri në gjysmëfinale apo finale dhe madje Brazili shihej si favorit për të fituar trofeun. Por nuk ndodhi kështu dhe presioni u ushtrua jo vetëm tek lojtarët, por edhe stafi teknik me në krye trajnerin Tite. Ky i fundit dha dorëheqjen dhe prej atij momenti Brazili është pa trajner në pankinën e tij. Ka pasur shumë emra që kanë qarkulluar, por gjithnjë e më shumë gishti po drejtohet tek tekniku veteran italian Karlo Ançeloti, i cili është aktualisht në krye të Realit të Madridit. Por ecuria e madrilenëve këtë sezon duket e vështirë në të gjitha frontet. I eliminuar në kupë, jashtë objektivit titull deri tani, me opsion fitoreje vetëm në Champions, Reali duket se mund të dështojë në të gjitha frontet këtë edicion, prandaj pozita e Ançelotit është e rënduar dhe nuk përjashtohet mundësia e shkarkimit të tij pa mbërritur fundi i sezonit. Pra, e thënë me fjalë të tjera, me kampionatin që po shkon drejt Barcelonës, Liga e Kampionëve është objektivi i vetëm i mbetur këtë sezon për Realin e Madridit, që vitin e kaluar bëri bis dhe nuk mund t’i lejojë vetes ta mbyllë pa trofe. Por pavarësisht nëse do t’ia dalë të ngrejë një kupë lart në fund të sezonit apo jo, Karlo Anceloti duket se po kalon muajt e fundit të aventurës së tij në “Santiago Bernabeu”, ku ka fituar gjithçka si trajner. Italiani joshet nga ideja për të drejtuar Kombëtaren e Brazilit dhe ndonëse publikisht e ka mohuar, duket se ka lënë gjithçka të hapur për një bashkëpunim, duke nisur nga vera e ardhshme. Brazili ka gjetur një trajner të përkohshëm, si Ramon Menezes, i cili duket se do të qëndrojë aty derisa Ancelotti të largohet nga Reali i Madridit. Italiani nuk ka provuar asnjë eksperiencë në stolin e një kombëtareje dhe sheh Brazilin si “pjacën” e duhur për të shkuar dhe lënë gjurmë, ashtu siç ka bërë në klube, duke ftuar trofetë më të rëndësishëm. Ndërkohë, Perez duket gati t’i plotësojë dëshirën teknikut italian dhe po studion alternativat, teksa së fundi ka dalë në skenë emri i Raul Gonzales, ish-sulmues legjendar i madrilenëve, që aktualisht drejton skuadrën e dytë të Realit. Precedenti me Zidane, që erdhi nga skuadra e dytë dhe fitoi tre herë radhazi Ligën e Kampionëve, josh jo pak Perez, që shpreson të përsëritë të njëjtin sukses edhe me Raul Gonzales. Megjithatë, duke u kthyer tek Ançeloti, ai këtë herë mund ta pranojë vërtet ofertën e Brazilit.