Ballkani i Dajës mund thellë Llapin, tani një pikë larg Dritës kryesuese

Ballkani është shndërruar në skuadrën më cilësore në Kosovë. Pasi e mbylli sezonin e shkuar si kampione dhe njëherësh mori pjesë në kompeticionet e UEFA-s, ku shkoi deri në grupe të Ligës së Konferencës, tani po synon të fitojë sërish titullin në kampionatin “dardan”. Kampioni i Kosovës Ballkani ka shënuar fitore të thellë të dielën në Podujevë. Skuadra nga Suhareka mposhti Llapin me rezultatin 3:0, në ndeshjen e mbetur të javës së shtatë të Superligës së Kosovës në futboll. Kjo ndeshje u zhvillua në stadiumin “Zahir Pajaziti”. Me këtë fitore Ballkani i është afruar në një pikë lideres, Dritës. Ballkani ka edhe një ndeshje më pak të zhvilluar. Ndeshjen kundër Prishtinës do ta zhvilloj më 11 dhjetor në Suharekë. Golin e parë e shënoi Albion Rrahmani në minutën e 245-t, ndërsa në pjesën e dytë suharekasit shënuan edhe dy gola. Në minutën e 56-të shënoi Armend Thaqi, ndërsa tre minuta më vonë Meriton Korenica realizoi golin e tretë dhe të fitores së 11-të në 17 ndeshje të zhvilluara. Llapi stinorin vjeshtor e mbyll në vendin e gjashtë me 20 pikë, sa ka edhe Drenica një pozitë më poshtë. Duhet thënë se nën drejtimin e Ilir Dajës, Ballkani ka pasur progres madhështor.