“BBC” paralajmëron me fakte kalimin e Armando Brojës në Serie A

Mediat në Itali dhe në Angli po i bëjnë jehonë lajmit që Napoli dhe ndonjë klub tjetër italian po kërkojnë me insistim sulmuesin shqiptar Armando Broja. Djaloshi nuk po kalon një moment të mirë, pasi ka disa javë që nuk shënon, por për cilësitë që shfaqi këtë sezon ai sërish mbetet një nga të rinjtë më të kërkuar në treg. Kështu, mediat shkruajnë se Napoli vazhdon të insistojë për Armando Brojën. Klubi italian ka piketuar sulmuesin e talentuar shqiptar si pasardhësin e Viktor Osimhen, për të cilin interesohet Mançester Junajtid. “BBC” shkruan se drejtuesit e Napolit po ndjekin me interes 20-vjeçarin nga Malësia e Madhe, i cili është huazuar te Sauthempton këtë sezon, duke realizuar 9 gola dhe 1 asist në 36 ndeshje. “Transfermarket” e vlerëson Brojën 18 milionë euro, por sigurisht që Çelsi do kërkojë më shumë për ta lënë të lirë, edhe pse duhen konfirmuar ndryshimet në pronësi për të nisur zyrtarisht bisedimet e shitjes. Thomas Tuhel e vlerëson shumë yllin shqiptar dhe dëshiron ta ketë pjesë të ekipit në fazën përgatitore, me Brojën që do të provojë shanset e tij te “Blutë e Londrës”, me të cilët ka kontratë deri në 2026. Sulmuesi debutoi me kombëtaren shqiptare në shtatorin e vitit 2020, dhe deri tani ka realizuar tre gola në nëntë takime me kuqezinjtë e Edi Rejës. Te Napoli e cilësojnë si zëvendësuesin perfekt të sulmuesit nigerian. Çelsi mund të pranojë huazimin ose shitjen e Brojës, por kërkon të përfshijë një klauzolë riblerje në të ardhmen.

Trajneri i Sauthemptonit shpjegon “shterpësinë” e Brojës

Trajneri i Sauthemptonit, Ralf Hasenhutl, i kërkoi klubit që të zgjasë qëndrimin e talentit të kombëtares shqiptare, Armando Brojës me një tjetër sezon. 20-vjeçari u bashkua me Sauthempton në formë huazimi nga Çelsin në verë. Gjatë këtij sezoni Broja ka shënuar gjashtë gola në 29 paraqitje në Premier League. Ndërsa ka folur përpara ndeshjes kundër Kristal Palase, Hasenhutl tha: “Në këtë moment nuk është e lehtë të negociosh me Çelsi. Nuk ka dyshim dhe nuk është për t’u habitur që dua që ai të qëndrojë këtu edhe një vit. Unë e di se kjo do të ishte mirë për të.” Hasenhutl pati deklaruar në janar se bisedimet për të zgjatur qëndrimin e shqiptarit te Sauthempton ishin në zhvillim e sipër. Pavarësisht fillimit shumë të mirë të sezonit me Sauthempton, me katër gola nga gjashtë në total që ka shënuar, Broja tashmë ka 10 takime pa realizuar. Megjithatë, Hasenhutl nuk është i shqetësuar nga rënia e formës së sulmues, për të cilin shtoi: “Interesantja është se lojtarët e rinj nuk lejohen të bëjnë, dy apo tre-katër ndeshje të këqija, sepse nuk është e kuptueshme. Por është e kuptueshme. Pas performancës që bëri, të gjithë e njohin tani dhe të gjithë po kujdesen për të. Është shumë më e vështirë. Unë e di këtë si sulmues. Nëse askush nuk ju njeh dhe nuk i njeh pikat tuaja të forta, atëherë është më e lehtë të konkurroni. Është krejtësisht normale që vjen një moment që të kesh pak ngecje. Gjëja më e rëndësishme është që ai të fillojë të punojë shumë përsëri dhe të luftojë për të qenë i rrezikshëm”, shtoi ai.